Rossiyada davlat xizmatchilari va davlat sirlaridan xabardor xodimlarning chet el safarlari ustidan nazorat kuchaytiriladi. Bu haqda “Izvestiya” xabar berdi.
Rossiya davlat Dumasiga tegishli qonun loyihasi kiritilishi kutilmoqda. Unga ko‘ra ish beruvchilar davlat sirlariga kirish huquqiga ega xodimlarning xorijiy pasportlarini tekshirishi mumkin bo‘ladi. Tashabbus allaqachon “Yagona Rossiya” fraksiyasining qonunchilik faoliyati bo‘yicha ekspertlar kengashi tomonidan ma’qullangan.
“Xorijga chiqish pasportini taqdim etish davlat sirlariga ega bo‘lgan rossiyaliklarning ruxsatsiz sayohat qilishlari bilan bog‘liq muammoni hal etishda yordam beradi. Agar xodim ruxsat olmay Rossiyadan chiqib ketgan bo‘lsa, buni pasportdagi belgilarni solishtirish orqali aniqlash oson bo‘ladi. Huquqbuzarlik uchun sanksiya sifatida pasport haqiqiy emas deb topiladi”, — deydi davlat Dumasi xavfsizlik qo‘mitasi raisi o‘rinbosari Anatoliy Viborniy.
Deputat gap qonunchilikni qat’iylashtirish emas, balki yuzaga kelgan chaqiriq va tahdidlarni hisobga olgan holda takomillashtirish haqida ketayotganini aytdi. O‘z navbatida, Rossiya bosh prokurori o‘rinbosari Nikolay Vinnichenko qonun loyihasini to‘liq qo‘llab-quvvatlashini bildirdi.
Izoh (0)