Davlat xavfsizlik xizmati Samarqand viloyati boshqarmasi xodimlari tomonidan giyohvandlik vositalarining noqonuniy aylanmasiga chek qo‘yildi, deb xabar beradi O‘zA.
Qayd etilishicha, Urgut tumani “Chep” mahallasida yashovchi 27 yoshli A.D. va “Vatkan-Qo‘zibek” mahallasida yashovchi 42 yoshli Sh.X. jinoiy til biriktirib, giyohvand modda oldi-sotdisi bilan shug‘ullanib kelayotgani aniqlangan.
Viloyat huquq-tartibot idoralari xodimlarini jalb qilgan holda o‘tkazilgan tezkor tadbirda fuqarolar A.D., Z.F. hamda Sh.X. harakatlanib ketayotgan avtomashinada 248,33 gramm miqdorda geroin giyohvandlik vositasi borligi aniqlanib, xolislar ishtirokida rasmiylashtirilgan.
Dastlabki surishtiruv harakatlari davomida aniqlanishicha, ushbu giyohvandlik vositalari fuqaro A.D.ga tegishli bo‘lib, uni Qoraqalpog‘istonning To‘rtko‘l tumanida yashovchi fuqaroga yetkazib berishni rejalashtirgan.
Mazkur holat bo‘yicha Sh.X. va A.D.ga nisbatan Jinoyat kodeksining tegishli moddalari bilan jinoyat ishi qo‘zg‘atilgan.
Avvalroq Farg‘onada 17 yoshli bola yashayotgan uydan 30 kilodan ortiq narkotik moddalar topilgani to‘g‘risida xabar berilgandi. Shuningdek, Samarqandda fuqaroning uyidan salkam 32 kilo marixuana topilgan, DXX tomonidan Tojikiston va Qirg‘izistondan olib kelingan narkotik moddalar to‘xtatib qolingan edi.
Izoh (0)