Davlat xavfsizlik xizmati xodimlari tomonidan qo‘shni davlatlardan kontrabanda yo‘li bilan olib kelingan narkotik moddalar to‘xtatib qolindi.
Qayd etilishicha, DXXning Navoiy va Samarqand viloyatlari bo‘yicha boshqarma xodimlari hamkorligida Nurobod tumanida tezkor tadbir o‘tkazilgan. Tadbirda Urgut tumanida yashovchi 21 yoshli shaxs Nurobod tumanida istiqomat qiluvchi 40 yoshli jinoiy sherigi bilan til biriktirib, Tojikistondan olib kelingan 2 kilogramm 875 gramm opiy moddasini 40,5 ming dollarga sotgan vaqtida qo‘lga olingan.
Davlat xavfsizlik xizmatining Samarqand viloyati bo‘yicha boshqarmasi va Chegara qo‘shinlari harbiy xizmatchilari tomonidan ichki ishlar organlari xodimlarini jalb qilgan holda o‘tkazilgan tezkor tadbirda, Samarqand—Toshkent yo‘nalishida harakatlanayotgan Cobalt rusumli avtomashina Jomboy tumani hududida to‘xtatilib, ko‘zdan kechirilgan. Unda yo‘lovchi sifatida ketayotgan, Urgut tumanida yashovchi, 31 va 28 yoshli ikki nafar shaxsning yonida 1 kilogramm 616 gramm opiy moddasi borligi maʼlum bo‘ldi.
Davlat xavfsizlik xizmatining Farg‘ona viloyati bo‘yicha boshqarmasi xodimlari tomonidan ichki ishlar organlari bilan hamkorlikda o‘tkazilgan tezkor tadbirda esa Toshkent—Farg‘ona yo‘nalishida harakatlanayotgan Nexia rusumli avtomashina Namangan viloyatining Pop tumanidagi YPX maskanida to‘xtatilgan. Ammo to‘xtash jarayonida avtotransport vositasida yo‘lovchi sifatida ketayotgan, Bag‘dod tumanida tug‘ilgan 37 yoshli shaxs avtomashina oynasidan bir dona paketni uloqtirib yuborgan.
Shundan so‘ng, ushbu paket xolislar ishtirokida tekshirib ko‘rilganda, unda 1 kilogramm 915 gramm gashish moddasi borligi maʼlum bo‘lgan. Aniqlanishicha, mazkur fuqaro tojikistonlik narkokuryerlar tomonidan Toshkent viloyatining Bo‘ka tumanidagi xufiya joyga qoldirib ketilgan ajal og‘usini olib ketayotgan bo‘lgan. U giyohvandlik vositasini 8 ming dollarga sotib olgan.
Farg‘ona viloyatining Oltiariq tumanida o‘tkazilgan tezkor tadbirda bo‘lsa Farg‘ona tumanida yashovchi, muqaddam giyohvandlik vositalari savdosi bilan bog‘liq jinoyati uchun sudlangan 34 yoshli shaxs 770 gramm gashish moddasini 7 ming dollarga sotgan vaqtida qo‘lga olingan.
Tergovga qadar tekshiruv davomida, Qirg‘izistondan kontrabanda yo‘li bilan olib kelingan ushbu narkotik moddaning haqiqiy egasi Farg‘ona tumanida yashovchi 24 yoshli fuqaro ekani aniqlanib, u ham ushlangan.
Hozirda ushbu shaxslarning barchasiga nisbatan Jinoyat kodeksining tegishli moddalari bilan jinoyat ishlari qo‘zg‘atilib, qamoq ehtiyot chorasi qo‘llanilgan.
Avvalroq Farg‘onada 17 yoshli bola yashayotgan uydan 30 kilodan ortiq narkotik moddalar topilgani to‘g‘risida xabar berilgandi. Shuningdek, Samarqandda fuqaroning uyidan salkam 32 kilo marixuana topilgan edi.
Izoh (0)