Davlat xavfsizlik xizmati Rossiya va Qozog‘istondan olib kelingan 19,7 kilogramm sintetik narkotik moddalarni musodara qildi.
Qayd etilishicha, DXXning Toshkent shahar bo‘yicha boshqarmasi xodimlari tomonidan ichki ishlar organlari bilan hamkorlikda Toshkent shahri va Toshkent viloyati hududida bir nechta tezkor tadbir o‘tkazilgan.
Jumladan, Toshkent viloyatining Qibray tumanida yashovchi fuqaroning yashash xonadoni ko‘zdan kechirilganda, sotish uchun tayyorlab qo‘yilgan 4 kilogramm 824 gramm “Mefedron”, 3 kilogramm 274 gramm “Spays” va 2 kilogramm 130 gamm “Alfa-PVP” sintetik giyohvandlik vositalari borligi maʼlum bo‘lib, ular tegishli tartibda rasmiylashtirib olingan.
Aniqlanishicha, ushbu narkotik moddalar O‘zbekistonga bojxona nazoratini chetlab o‘tgan holda Qozog‘istondan olib kelingan va kelgusida ularni kichik bo‘laklarga bo‘lgan holda, internet tarmog‘i orqali sotish rejalashtirilgan.
Boshqa holatda esa uch dona avtomobil ehtiyot qismi (“kardan vali”) ichiga yashirilib, Rossiyadan yuk avtomashinasida yuborilgan 3 kilogramm 780 gramm “Mefedron” sintetik giyohvandlik vositasini Toshkent viloyatining Zangiota tumanida qabul qilib olgan vaqtida, Toshkent shahrida yashovchi ikki nafar va Toshkent viloyatida istiqomat qiluvchi bir nafar shaxs ashyoviy dalillar bilan ushlangan.
Ma’lum bo‘lishicha, ushbu narkotik moddalar ham kichik bo‘laklarga bo‘lingan holda, internet tarmog‘i orqali mijozlarga sotilishi rejalashtirilgan.
Sirdaryo viloyatida tug‘ilgan fuqaroning Toshkent shahar Yangihayot tumanidagi vaqtincha yashash xonadoni ko‘zdan kechirilganda esa 5 kilogramm 687 gramm “Pregabalin” kuchli taʼsir qiluvchi moddasi borligi maʼlum bo‘lgan.
Mazkur shaxs Rossiyadan keltirilgan ushbu kuchli taʼsir qiluvchi moddalarni kichik bo‘laklarda Yangihayot va Sergeli tumanlari hududidagi xufiya joylarga yashirib, so‘ngra ularni Telegram messenjeri orqali mijozlarga sotishni reja qilgan.
Hozirda mazkur shaxslarga nisbatan jinoyat ishlari qo‘zg‘atilib, qamoq ehtiyot chorasi qo‘llangan.
Avvalroq Farg‘onada 17 yoshli bola yashayotgan uydan 30 kilodan ortiq narkotik moddalar topilgani to‘g‘risida xabar berilgandi. Shuningdek, Samarqandda fuqaroning uyidan salkam 32 kilo marixuana topilgan, DXX tomonidan Tojikiston va Qirg‘izistondan olib kelingan narkotik moddalar to‘xtatib qolingan edi.
Izoh (0)