O‘zbekistonning Qatardagi elchisi Ashraf Xo‘jayev Qatar taʼlim va oliy taʼlim vaziri Busaina bint Ali an-Nuaymiy bilan uchrashuv o‘tkazdi. Bu haqda “Dunyo” agentligi xabar berdi.
Suhbat davomida Qatar universitetlarida o‘zbekistonlik talabalar uchun kvotalar ajratish va ularning sonini ko‘paytirish, Qatar va O‘zbekiston maktab va oliy taʼlim muassasalari o‘rtasida almashinuv, dolzarb yo‘nalishlarda qo‘shma o‘quv dasturlari va ilmiy loyihalar, tadqiqotlar tashkil etish kabi masalalar muhokama qilingan.
Qatar vaziri, shuningdek, o‘rta maktab o‘quvchilari o‘rtasida o‘zaro almashinuvlarni yo‘lga qo‘yish hamkorlik yo‘nalishlaridan biri bo‘lishi mumkinligini bildirgan. Qayd etilishicha, Qatar Madaniyat vazirligi bilan hamkorlikda o‘tgan aprel oyida qatarlik maktab yoshidagi bolalar jamoasining Toshkent va Samarqandga sayohati uyushtirilgan. Qatar tomoni ushbu loyiha muvaffaqiyatli amalga oshirilganini qayd etish barobarida, uni doimiy va o‘zaro tarzda yo‘lga qo‘yish mumkinligini maʼlum qilgan.
Muloqot chog‘ida hozirgi kunda dolzarb hisoblanadigan sohalarda qo‘shma ilmiy izlanishlar va tadqiqotlar o‘tkazish taklifi ham Qatar tomonidan qo‘llab-quvvatlangan.
Muzokaralar natijasida O‘zbekiston va Ko‘rfaz arab mamlakatlari rektorlari forumini o‘tkazish tashabbusini o‘rganish va ushbu sohaga oid boshqa bir qator loyihalarni amalga oshirish bo‘yicha muloqotni davom ettirish to‘g‘risida kelishib olingan.
O‘zbekiston—Qatar munosabatlari
So‘nggi vaqtlarda ikki davlat o‘rtasida turli sohalarda hamkorlik rivojlanmoqda. 2023-yilning oktyabrida Shavkat Mirziyoyev Qatarga tashrif buyurib shayx Tamim bin Hamad al-Taniy bilan muzokaralar o‘tkazgan, uning yakuni bo‘yicha qator hujjatlar, xususan, turizm va ishbilarmonlik tadbirlari sohasida bitim imzolangandi. O‘zbekiston va Qatar yetakchilari ikki tomonlama sheriklikni sifat jihatidan yangi darajaga olib chiqishga kelishgan.
Izoh (0)