Samarqandda fuqaroning uyidan salkam 32 kilo marixuana topildi

Samarqand viloyati Jomboy tumanida salkam 32 kilogramm giyohvandlik vositasini saqlab kelayotgan shaxs ushlandi, deb xabar beradi O‘zA.

Ma’lum qilinishicha, Samarqand viloyat huquq-tartibot idoralari tomonidan Jomboy tumanida tezkor tadbir o‘tkazilgan. Tadbirda “Eski Jomboy” mahallasida yashovchi 41 yoshli A.A.ning yashash uyi va yordamchi xo‘jalik xonalarida tintuv o‘tkazilganda og‘irligi 31 kilogramm 855 gramm bo‘lgan marixuana giyohvandlik vositasi, 2 gramm opiy giyohvandlik moddasi va 2 dona psixotrop tabletka topilib, tegishli tartibda rasmiylashtirilgan.

DXX viloyati boshqarmasi hamda IIB xodimlari hamkorligida o‘tkazilgan yana bir tezkor tadbir davomida Samarqand tumanida yashovchi 33 yoshli R.A. hamda 32 yoshli B.M. 198 dona “Zardeks” psixotrop dori vositasini mahalliy fuqaroga sotayotgan vaqtida ashyoviy dalillar bilan qo‘lga olingan.

Yuqoridagi holatlar yuzasidan ushbu shaxslarga nisbatan Jinoyat kodeksining tegishli moddalari bilan jinoyat ishi qo‘zg‘atilib, tergov harakatlari olib borilmoqda.

Avvalroq Farg‘onada 17 yoshli bola yashayotgan uydan 30 kilodan ortiq narkotik moddalar topilgani to‘g‘risida xabar berilgandi.