O‘zbekiston va Qatar o‘rtasida imzolangan soliq sohasidagi ikki tomonlama xalqaro shartnoma kuchga kirdi. Bu haqda “Dunyo” AA xabar berdi.
Maʼlum qilinishicha, 2023-yil 6-iyun kuni Samarqand shahrida imzolangan “O‘zbekiston Respublikasi hukumati bilan Qatar davlati hukumati o‘rtasida daromad soliqlari bo‘yicha ikki yoqlama soliqqa tortishni bartaraf qilish hamda soliqlarni to‘lashdan bosh tortish va bo‘yin tovlashning oldini olish to‘g‘risida”gi bitim 2024-yil 12-fevraldan eʼtiboran kuchga kirgan.
Mazkur hujjatning asosiy maqsadi — O‘zbekiston va Qatar o‘rtasida soliq sohasidagi ikki tomonlama munosabatlarning huquqiy asoslarini shakllantirish.
Bitim quyidagilarni nazarda tutadi:
- ikki yoqlama soliqqa tortishni bartaraf etish;
- soliq to‘lashdan qochishning oldini olish;
- tomonlar o‘rtasida soliqqa tortish huquqlarini taqsimlash;
- soliqqa tortish orqali kamsitishlarning oldini olish.
“Ushbu xalqaro shartnomaning kuchga kirishi ikki tomonlama hamkorlikni mustahkamlaydi va tomonlarning investitsiyaviy salohiyatini kengaytirishga xizmat qiladi”, — deyiladi xabarda.
Izoh (0)