Qatarda Shavkat Mirziyoyevni tantanali kutib olish marosimi bo‘lib o‘tdi (foto)

Doha shahridagi “Amiri Devon” majmuasida davlat tashrifi bilan Qatarda bo‘lib turgan Shavkat Mirziyoyevni rasmiy kutib olishga bag‘ishlangan tantanali marosim bo‘lib o‘tdi.

Prezident matbuot xizmatining xabar qilishicha, O‘zbekiston yetakchisini Qatar amiri shayx Tamim bin Hamad al-Soniy samimiy kutib oldi. Oliy martabali mehmon sharafiga faxriy qorovul saf tortdi. Harbiy orkest ikki mamlakat madhiyalarini ijro etdi. Davlat rahbarlari faxriy qorovul safi oldidan o‘tdilar va rasmiy delegatsiyalar a’zolarini qutladi.

Marosimdan so‘ng oliy darajadagi muzokaralar boshlandi.

Shavkat Mirziyoyevning Qatarga tashrifi tavsilotlari

Shavkat Mirziyoyev Qatar amiri shayx Tamim ibn Hamad al-Soniy taklifiga binoan 1-okytabrdan buyon davlat tashrifi bilan Qatarning Doha shahrida bo‘lib turibdi. Tashrif davomida Qatarning yetakchi energetika korporatsiyasi bo‘lgan Nebras Power boshqaruvi raisi Muhammad al-Hajriyni qabul qildi. Uchrashuvda Toshkent viloyatida 600 MVt quvvatli energiya saqlash tizimlarini yaratish hamda Qoraqalpog‘istonda 1 GVt quvvatli shamol elektr stansiyasini ishga tushirish bo‘yicha qo‘shma rejalar muhokama qilindi.

Qatar investitsiyalar agentligi direktori Bandar ibn Saud al-Soniyni qabul qildi. Uchrashuvda agentlikning to‘g‘ridan-to‘g‘ri investitsiyalarini O‘zbekistonda “yashil” energetika obyektlari — quyosh va shamol stansiyalarini qurish, transport infratuzilmasini modernizatsiya qilish, jumladan zamonaviy aviaterminallar barpo etish va boshqa investitsiya loyihalariga jalb qilish masalalari ko‘rib chiqildi. Ilg‘or bank-moliya xizmatlarini, jumladan islom moliyasi dasturlari doirasida rivojlantirishdan manfaatdorlik bildirildi.

Power International Holding kompaniyasi boshqaruvi raisi Mutaz al-Hayyat bilan uchrashuvda O‘zbekistonda yuqori tezlikda harakatlanishga mo‘ljallangan avtomobil magistralini barpo etish, ammiak va karbamid ishlab chiqarish hajmini oshirish, ishbilarmonlik va mehmonxona infratuzilmasi, sog‘liqni saqlash obyektlarini tashkil etish loyihalari muhokama qilindi.

Al Mirqab Capital xolding kompaniyasi ijrochi direktori Saif ur-Rahmon Xon bilan Toshkent viloyatida logistika markazi, Buxoro shahrida mehmonxona-kongress majmuasini qurish, O‘zbekistonda elektr ishlab chiqarish quvvatlarini kengaytirishga investitsiya kiritish rejalari ko‘rib chiqildi.