Qatar aviakompaniyasi iyun oyidan Doha—Toshkent yo‘nalishida to‘g‘ridan to‘g‘ri aviaqatnovlarni yo‘lga qo‘yadi, deb xabar berdi “Dunyo” AA.
-6q61nZY2.jpg)
Ma’lum qilinishicha, O‘zbekiston elchisi Ashraf Xo‘jayev Qatar Airways kompaniyasi bosh ijrochi direktori Badr Muhammad Al-Miyr bilan uchrashdi. Unda davlatlararo to‘g‘ridan to‘g‘ri aviaqatnovlarni yo‘lga qo‘yish, kargo tashuvlarini amalga oshirish, zamonaviy aviaxizmatlar sohasida tajriba almashish kabi masalalar muhokama qilindi.
Badr Muhammad Al-Miyr O‘zbekiston va Qatar o‘rtasida do‘stona aloqalarni shakllantirishda davlatlarni bog‘lab turadigan aviaqatnovlarni yo‘lga qo‘yish juda muhim ekanligiga e’tibor qaratdi.
“Rejalarimiz va umidlarimiz ulkan. Dastlab haftasiga to‘rt marta, keyinchalik esa kunlik ravishda havo qatnovlarini amalga oshirishni rejalashtirganmiz”, — degan kompaniya bosh ijrochi direktori.
Ta’kidlanishicha, to‘g‘ridan to‘g‘ri aviaqatnovlar orqali o‘zaro turistlar oqimi va ikki tomonlama savdo hajmi ham oshib boradi.
Uchrashuv yakunida tomonlar 2-iyun kuni Doha—Toshkent—Doha aviaqatnovining tantanali ochilish marosimini o‘tkazishga kelishib oldi.
O‘zbekiston—Qatar munosabatlari
So‘nggi vaqtlarda ikki davlat o‘rtasida turli sohalarda hamkorlik rivojlanmoqda. 2023-yilning oktyabrida Shavkat Mirziyoyev Qatarga tashrif buyurib shayx Tamim bin Hamad al Taniy bilan muzokaralar o‘tkazgan, uning yakuni bo‘yicha qator hujjatlar, xususan, turizm va ishbilarmonlik tadbirlari sohasida bitim imzolangandi. O‘zbekiston va Qatar yetakchilari ikki tomonlama sheriklikni sifat jihatidan yangi darajaga olib chiqishga kelishgan.
Izoh (0)