Ўзбекистоннинг Қатардаги элчиси Ашраф Хўжаев Қатар таълим ва олий таълим вазири Бусаина бинт Али ан-Нуаймий билан учрашув ўтказди. Бу ҳақда “Дунё” агентлиги хабар берди.
Суҳбат давомида Қатар университетларида ўзбекистонлик талабалар учун квоталар ажратиш ва уларнинг сонини кўпайтириш, Қатар ва Ўзбекистон мактаб ва олий таълим муассасалари ўртасида алмашинув, долзарб йўналишларда қўшма ўқув дастурлари ва илмий лойиҳалар, тадқиқотлар ташкил этиш каби масалалар муҳокама қилинган.
Қатар вазири, шунингдек, ўрта мактаб ўқувчилари ўртасида ўзаро алмашинувларни йўлга қўйиш ҳамкорлик йўналишларидан бири бўлиши мумкинлигини билдирган. Қайд этилишича, Қатар Маданият вазирлиги билан ҳамкорликда ўтган апрель ойида қатарлик мактаб ёшидаги болалар жамоасининг Тошкент ва Самарқандга саёҳати уюштирилган. Қатар томони ушбу лойиҳа муваффақиятли амалга оширилганини қайд этиш баробарида, уни доимий ва ўзаро тарзда йўлга қўйиш мумкинлигини маълум қилган.
Мулоқот чоғида ҳозирги кунда долзарб ҳисобланадиган соҳаларда қўшма илмий изланишлар ва тадқиқотлар ўтказиш таклифи ҳам Қатар томонидан қўллаб-қувватланган.
Музокаралар натижасида Ўзбекистон ва Кўрфаз араб мамлакатлари ректорлари форумини ўтказиш ташаббусини ўрганиш ва ушбу соҳага оид бошқа бир қатор лойиҳаларни амалга ошириш бўйича мулоқотни давом эттириш тўғрисида келишиб олинган.
Ўзбекистон—Қатар муносабатлари
Сўнгги вақтларда икки давлат ўртасида турли соҳаларда ҳамкорлик ривожланмоқда. 2023 йилнинг октябрида Шавкат Мирзиёев Қатарга ташриф буюриб шайх Тамим бин Ҳамад ал-Таний билан музокаралар ўтказган, унинг якуни бўйича қатор ҳужжатлар, хусусан, туризм ва ишбилармонлик тадбирлари соҳасида битим имзоланганди. Ўзбекистон ва Қатар етакчилари икки томонлама шерикликни сифат жиҳатидан янги даражага олиб чиқишга келишган.
Изоҳ (0)