Rossiyaning ikkita strategik bombardimonchi samolyotlari 3-may kuni AQSHning Alyaska shtati yaqinida sinov parvozini amalga oshirgan. Bu haqda “TASS” nashri xabar berdi.
Manbada aytilishicha, Tu-95MS rusumli samolyotlar Alyaskaning g‘arbiy sohillari yaqinida parvoz qilgan. Rus rasmiylari parvozlar Bering bo‘g‘ozining betaraf suvlarida amalga oshirilganini bildirgan.
3-may kuni Rossiya Mudofaa vazirligi AQSH yaqinida bombardimonchi samolyotlar uchirilgani haqidagi xabarni rasman tasdiqlagan. Manbaga ko‘ra, parvozda bir qancha xorijiy mamlakatlar havo kemalari ham ishtirok etgan.
“Rossiya aerokosmik kuchlarining ikkita Tu-95MS strategik raketa tashuvchi bombardimonchi samolyotlari Alyaskaning g‘arbiy qirg‘oqlari yaqinida, Bering dengizining neytral suvlari ustidagi havo hududida rejali parvozni amalga oshirdi. Parvoz 11 soatdan ortiq davom etdi. Aerokosmik kuchlarning Su-30SM samolyotlari ekipajlari qiruvchi samolyotlarga yordam ko‘rsatdi”, — deyilgan Rossiya Mudofaa vazirligi eʼlon qilgan bayonotda.
Rossiyaning uzoq masofali bombardimonchi samolyotlari muntazam ravishda Arktikaning neytral suvlari, Shimoliy Atlantika, Qora va Boltiq dengizlari, shuningdek, Tinch okeani ustidan parvozlarni amalga oshirishi maʼlum qilingan. Bu safargi sinov parvozlarida oldingilaridan farqli ravishda, xorijiy mamlakatlar havo kuchlari ishtirok etgani taʼkidlandi. Vazirlik bu kuchlar aynan qaysi mamlakatlarga tegishli ekanligi haqida maʼlumot taqdim etmagan.
“Rossiya Aerokosmik kuchlarining samolyotlari barcha parvozlarni havo hududidan foydalanishning xalqaro qoidalariga qatʼiy rioya qilgan holda amalga oshiradi”, — deyilgan rasmiy xabarda.
Izoh (0)