Эрон Британия мудофаа вазирига санкция қўллади

Эрон Буюк Британия мудофаа вазири Грант Шэппс ва Кипрдаги Акротири авиабазасини санкциялар рўйхатига киритди. Бу ҳақда Tasnim хабар берди.

Санксийлар Британия қуролли кучлари бошлиқлари, авиабаза қўмондонлари ва уч компанияга нисбатан ҳам қўлланилган. Бунга Британиянинг Исроилни қўллаб-қувватлагани сабаб бўлган. Эрон буни “тинчлик ва хавфсизликка қарши террорчилик ҳаракатларини” тарғиб қилиш деб баҳоламоқда.

Эрон Британия режими ва санаб ўтилган шахсларнинг Исроил содир этган террорчилик ҳаракатларини қўллаб-қувватлашдаги ҳаракатларини қоралайди. Бу Британиянинг терроризмга қарши кураш бўйича халқаро мажбуриятларини ва БМТ низомидаги халқаро ҳуқуқнинг асосий тамойилларини очиқдан очиқ бузиш эканини билдиради, — дейилади Эрон Ташқи ишлар вазирлиги баёнотида.

Чекловларга Британия ҳарбий разведкаси раҳбари Эдриан Бёрд, Қуролли кучлар стратегик қўмондонлиги раҳбари Жеймс Ҳокенҳалл ва қироллик армиясининг бошқа юқори мартабали амалдорлари кирган. Санкциялар Британиянинг HMS Diamond эсминеци, унинг қўмондони Питер Эванс, шунингдек, HMS фрегати қўмондони Ричмонд Ричард Кемпга нисбатан жорий этилган. Лондонга кўра, кемалар Яман ҳусийларининг ҳужумлари муносабати билан Қизил денгизда навигация хавфсизлигини таъминлайди.

Британия апрель ойида Эронга қарши санкциялар киритишда АҚШга қўшилди. Улар орасида Мудофаа вазири Муҳаммад Ризо Аштияни, Қуролли кучлар бош штаби ва Ислом инқилоби қўриқчилари корпуси денгиз кучлари ҳам бор эди.

Британия январь ойидан бери ҳусийларнинг Қизил денгиздаги кемаларга қилган ҳужумларига АҚШ билан бирга жавоб қайтармоқда. Хусусан, Ямандаги нишонларга ҳужумлар уюштирилмоқда. Британия Исроилга апрель ойи ўрталарида, Исроил ҳудудига юзлаб дронлар ва ракеталар учирилганида Эроннинг ҳужумига қарши курашишда ёрдам берган.