Vashington va London Eronning bir necha jismoniy va yuridik shaxslarini Isroilga qarshi hujumlar uyushtirgani uchun sanksiyalar ro‘yxatiga kiritdi. Bu haqida AQSH prezidenti Jo Bayden ma’lum qildi.
“Biz ittifoqchilarimiz va hamkorlarimiz bilan birgalikda Isroilni himoya qildik. Biz ularga bu hujumni qaytarishga yordam berdik. Va bugun biz yangi sanksiyalar va eksport nazoratini joriy qilmoqdamiz”, — dedi Bayden.
AQSH G‘aznachiligi saytida 16 kishi va 11 yuridik shaxsga nisbatan sanksiya qo‘yilgani aytiladi.
Prezident sanksiyalar ro‘yxatiga Islom inqilobi qo‘riqchilari korpusi, Eron Mudofaa vazirligi hamda Eron hukumatining raketa va dronlar dasturiga aloqador jismoniy va yuridik shaxslar kiritilganini ta’kidladi.
O‘z navbatida, Buyuk Britaniya hukumati veb-sayti qirollik sanksiyalar ro‘yxatiga “Eronga mintaqada beqarorlashtiruvchi faoliyatni amalga oshirishga ruxsat bergan” yetti nafar jismoniy va oltita yuridik shaxsni qo‘shgani haqida xabar beradi.
Baydenning ta’kidlashicha, AQSHning barcha hamkorlari va ittifoqchilari Eronning beqarorlashtiruvchi harbiy dasturlarini cheklash uchun allaqachon qo‘shimcha choralarni joriy qilgan yoki kelajakda joriy qiladi.
14-aprelga o‘tar kechasi Eron Damashqdagi Eron konsulligiga yaqinda uyushtirilgan havo hujumiga javoban Isroilga qarshi ko‘plab raketa va dronlar zarbalarini berdi. Isroil Mudofaa kuchlari ular tomon 350 ga yaqin dron va raketa uchirilganini aytdi. Raketa va dronlarning aksariyati mamlakat havo hududidan tashqarida Isroil, AQSH, Buyuk Britaniya, Fransiya, Iordaniya va Saudiya Arabistoni kuchlari tomonidan tutib olingan.
Izoh (0)