Qo‘shma Shtatlar BMT Xavfsizlik kengashining Bosh Assambleyaga Falastin davlatini jahon tashkilotiga to‘liq a’zo sifatida qabul qilishni tavsiya etuvchi rezolyutsiya loyihasiga veto qo‘ydi. Bu haqda Deutsche Welle xabar berdi.
18-aprel kuni bo‘lib o‘tgan yig‘ilishda Xavfsizlik kengashining 12 a’zosi, jumladan, Rossiya va Xitoy Jazoir taklif qilgan hujjatni qabul qilish uchun ovoz bergan. Buyuk Britaniya va Shveysariya betaraf qolgan, faqat AQSH qarshi chiqqan.
Bu ovoz berish Falastin davlatchiligiga qarshilikni aks ettirmaydi, balki bu faqat tomonlar o‘rtasidagi to‘g‘ridan to‘g‘ri muzokaralar orqali amalga oshishini tan olishdir, — dedi AQSHning BMTdagi doimiy vakili o‘rinbosari Robert Vud.
Falastin milliy maʼmuriyati rahbari Mahmud Abbos AQSHning BMT Xavfsizlik kengashidagi vetosini “adolatsiz, axloqsiz va asossiz” deya qoralagan. Uning so‘zlariga ko‘ra, bu Falastinning jahon tashkilotiga to‘liq aʼzo bo‘lishini qatʼiy qo‘llab-quvvatlovchi xalqaro hamjamiyat irodasiga ziddir.
Isroil tashqi ishlar vaziri Israel Kats Qo‘shma Shtatlarning veto huquqidan foydalanishini olqishlagan.
Ushbu sharmandali taklif rad etildi. Terrorizm mukofotlanmaydi, — dedi Kats.
Jazoirning BMTdagi doimiy vakili Amar Benjama ovoz berishdan oldin falastinliklarni jahon tashkilotiga qabul qilish ikki davlat yechimiga putur yetkazishdan ko‘ra mustahkamlanishini ta’kidlagan.
Rezolyutsiya ko‘rib chiqilishi uchun uni BMT Xavfsizlik kengashining 15 a’zosidan kamida to‘qqiztasi qo‘llab-quvvatlashi hamda besh doimiy a’zodan hech biri — AQSH, Xitoy, Rossiya, Fransiya va Buyuk Britaniya veto huquqidan foydalanmasligi lozim. Agar ushbu shart bajarilsa, ariza BMT Bosh Assambleyasining ovoziga qo‘yiladi.
Dastlab, Falastinning BMTga qabul qilish haqidagi arizasi 2011-yil noyabr oyida Xavfsizlik kengashining pozitsiyasi tufayli rad etilgan edi. Keyingi yili BMT AQSHning qarshiliklariga qaramay, falastinliklarga kuzatuvchi maqomini bergan. BMTga a’zo 193 davlatdan 139 tasi Falastinni mustaqil davlat sifatida tan olgan.
Izoh (0)