AQSH prezidenti Jo Bayden Isroil bosh vaziri Binyamin Netanyaxuning G‘azo sektorida urush olib borishga yondashuvini “xato” deb bilishini aytdi. Bu haqda u Univision telekanaliga bergan intervyusida ma’lum qildi.
Bayden Isroil hujumi oqibatida G‘azo sektorida World Central Kitchen gumanitar tashkilotining yetti nafar ko‘ngillisi halok bo‘lganini “dahshatli” deb atadi.
“Menimcha, uning (Binyamin Netanyaxu) qilayotgan ishi xato. Men bu yondashuvga qo‘shilmayman. Shuning uchun Isroilni o‘t ochishni to‘xtatishga va sektorga olti-sakkiz hafta ichida oziq-ovqat va dori-darmonlarga to‘liq kirishni ta’minlashga chaqiraman”, — dedi Bayden Univision telekanaliga bergan intervyusida.
Isroil 2-aprel kuni World Central Kitchen xodimlari bo‘lgan karvonga havodan zarba berdi. Ko‘ngillilar orasida Avstraliya, Buyuk Britaniya, Polsha, Falastin fuqarolari, shuningdek, AQSH va Kanada fuqaroligiga ega shaxs ham bor. Isroil armiyasi bosh shtabi rahbari Gerts Halevi Isroil harbiylarining zarbasini xato deb atadi. World Central Kitchen tashkiloti karvonning yo‘nalishi Isroil armiyasi bilan oldindan kelishilganini ma’lum qildi.
5-aprel kuni Jo Bayden va Binyamin telefon orqali 30 daqiqa suhbatlashdi. AQSH prezidenti Isroil taktikasini o‘zgartirmasa va G‘azoga gumanitar yordam yetkazilishini kengaytirmasa, HAMASga qarshi urushni qo‘llab-quvvatlash masalasini qayta ko‘rib chiqish bilan tahdid qildi. Bir necha soat o‘tgach, Isroil G‘azoga kuniga 500 tagacha yuk mashinasini kiritishga ruxsat beruvchi choralarni e’lon qildi.
Izoh (0)