Buxoro viloyati Romitan tumanida ota onkologiya va gematologiya markazida davolanayotgan qizi uchun ajratilgan pullarni o‘zlashtirib yuborgani aniqlandi. Bu haqda Bolalar ombudsmani xabar berdi.
Ma’lum qilinishicha, qizning onasi Sh.M.dan murojaat kelib tushgan. Unda ayol 2018-yilda tug‘ilgan qizi M.M. Respublika bolalar onkologiya va gematologiyasi markazida davolanayotganini, bolaning otasi T.J. qizini davolatishdan bosh tortib, moddiy ta’minlamasligini, aksincha bolaning davolanishi uchun “Saxovat va ko‘mak” jamg‘armasidan ajratilgan pulni o‘zlashtirganini bildirgan.
Bundan tashqari, turmush o‘rtog‘i unga va farzandiga ruhiy tazyiq o‘tkazayotganligi, bu esa bolaga salbiy ta’sir qilganligini bildirib, uni va farzandini otasining tazyiqlaridan himoya qilishda yordam so‘ragan.
Bolalar ombudsmanining Ijtimoiy himoya milliy agentligi va IIVga kiritgan so‘roviga asosan mazkur holat G‘ijduvon tumani “Inson” ijtimoiy xizmatlar markazi hamda tuman IIB tomonidan o‘rganildi.
O‘rganish natijasida fuqaro Sh.M. va voyaga yetmagan M.M. ga 1 oyga himoya orderi rasmiylashtirilib, otaning ruhiy zo‘ravonlik harakatlariga chek qo‘yildi.
Izoh (0)