Oliy Majlis Senati raisi Tanzila Norboyeva O‘zbekistonda mehmon bo‘lib turgan Germaniya Bundestagidagi “Germaniya—Markaziy Osiyo” parlament guruhi raisining o‘rinbosari Manfred Grund boshchiligidagi delegatsiya bilan uchrashuv o‘tkazdi. Bu haqda Senat matbuot xizmati xabar berdi.
O‘zbekiston va Germaniya munosabatlarining keng doirasi, xususan, siyosiy, savdo-iqtisodiy, ijtimoiy, madaniy-gumanitar hamkorlikni yanada mustahkamlash hamda parlamentlararo aloqalarni rivojlantirish masalalari muhokama qilindi.
Muloqot chog‘ida Germaniya Markaziy Osiyo mamlakatlari, jumladan, tez rivojlanib borayotgan O‘zbekiston bilan ko‘p qirrali munosabatlarni yanada chuqurlashtirishga tayyor ekanligi aytib o‘tildi. Birinchi navbatda barqaror o‘sib borayotgan iqtisodiy yo‘nalishda tovar ayirboshlash hajmini kengaytirish, yangi investitsiyalarni jalb etish, zamonaviy ishlab chiqarish korxonalarini tashkil etish bo‘yicha qiziqish bildirildi.
Ikki davlat o‘rtasidagi munosabatlarda parlamentlararo muloqotning muhimligidan kelib chiqib, bu borada qator rejalarga to‘xtalib o‘tildi. Xususan, ikki tomonlama aloqalarni huquqiy jihatdan taʼminlash, parlament qo‘mitalari o‘rtasida to‘g‘ridan-to‘g‘ri aloqalarni o‘rnatish va uni yanada rivojlantirish muhimligi qayd etildi. Shuningdek, elektron parlamentni joriy etish bo‘yicha tajriba almashishga kelishib olindi.
Delegatsiya aʼzolari tomonidan O‘zbekistonda xotin-qizlar tadbirkorligini rivojlantirish borasida amalga oshirilayotgan ishlarga yuqori baho berildi va mazkur jarayonda Germaniya faol ishtirok etishga tayyorligi bildirildi.
Suhbat davomida mehnat munosabatlari, gender tenglikni taʼminlash, ekologiya va atrof muhitni muhofaza qilish, madaniy-gumanitar sohalarda ham hamkorlikni chuqurlashtirish masalalari bo‘yicha fikr almashildi.
Uchrashuv yakunida o‘zaro tashriflarni tashkillashtirgan holda O‘zbekiston va Germaniya parlamentlari munosabatlarining yangi yo‘nalishlarini belgilab olish maqsadida hamkorlikka oid tegishli hujjatlarni ishlab chiqishga kelishib olindi.
Izoh (0)