“Tolibon” hukumati Xost viloyatidagi xotin-qizlar o‘qitiladigan barcha taʼlim muassasalari yopilishini eʼlon qildi. Bu haqda Hasht-e Subh Daily nashri maʼlum qildi.
Manbada aytilishicha, hozirga qadar kamida 200 ta mahalliy taʼlim muassasasi faoliyati “Tolibon” tomonidan to‘xtatilgan. Ushbu maʼlumotni 28-aprel kuni “Tolibon”ning Xost viloyatidagi taʼlim boshqarmasi mutasaddilari tasdiqlagan.
Yopilgan mahalliy o‘quv sinflarida sakkiz mingga yaqin talaba qizlar taʼlim-tarbiya bilan shug‘ullanib kelayotgani maʼlum qilingan. Bu sinflarda 200 dan ortiq o‘qituvchilar ham dars bergan.
Manbalarning qo‘shimcha qilishicha, yopilgan taʼlim tashkilotlari o‘tgan yillardagi xavfsizlik, ijtimoiy, iqtisodiy muammolar va o‘z hududlarida maktab yo‘qligi sababli taʼlimdan uzoqlashgan qizlarni o‘qitish bilan shug‘ullangan.
Manbada, shuningdek, “Tolibon” tomonidan Qandahor, Hilmand va G‘azni viloyatlarida ham qizlar uchun o‘nlab mahalliy taʼlim muassasalari yopib qo‘yilgani xabar qilingan. So‘nggi uch yil davomida “Tolibon” tomonidan qizlarning taʼlim olishiga cheklovlar qo‘yish holatlari ko‘paygani aytilgan.
Afg‘onistonda hozirda oltinchi sinfdan oshgan qizlar maktabga bora olmaydi. Qizlarning universitetga borishi ham taqiqlangan.
Izoh (0)