“Толибон” ҳукумати Хост вилоятидаги хотин-қизлар ўқитиладиган барча таълим муассасалари ёпилишини эълон қилди. Бу ҳақда Hasht-e Subh Daily нашри маълум қилди.
Манбада айтилишича, ҳозирга қадар камида 200 та маҳаллий таълим муассасаси фаолияти “Толибон” томонидан тўхтатилган. Ушбу маълумотни 28 апрель куни “Толибон”нинг Хост вилоятидаги таълим бошқармаси мутасаддилари тасдиқлаган.
Ёпилган маҳаллий ўқув синфларида саккиз мингга яқин талаба қизлар таълим-тарбия билан шуғулланиб келаётгани маълум қилинган. Бу синфларда 200 дан ортиқ ўқитувчилар ҳам дарс берган.
Манбаларнинг қўшимча қилишича, ёпилган таълим ташкилотлари ўтган йиллардаги хавфсизлик, ижтимоий, иқтисодий муаммолар ва ўз ҳудудларида мактаб йўқлиги сабабли таълимдан узоқлашган қизларни ўқитиш билан шуғулланган.
Манбада, шунингдек, “Толибон” томонидан Қандаҳор, Ҳилманд ва Ғазни вилоятларида ҳам қизлар учун ўнлаб маҳаллий таълим муассасалари ёпиб қўйилгани хабар қилинган. Сўнгги уч йил давомида “Толибон” томонидан қизларнинг таълим олишига чекловлар қўйиш ҳолатлари кўпайгани айтилган.
Афғонистонда ҳозирда олтинчи синфдан ошган қизлар мактабга бора олмайди. Қизларнинг университетга бориши ҳам тақиқланган.
Изоҳ (0)