Afg‘onistonda kuchli yomg‘ir va suv toshqini tufayli 17 ta oila bedarak yo‘qoldi

Afg‘onistonning Tahor viloyatida kuchli yomg‘ir va suv toshqini tufayli 17 ta oila bedarak yo‘qoldi. Bu haqda Hasht-e Subh Daily xabar berdi.

Viloyatning Varsaj, Farxor, Yangi Qal’a va Ishkemish tumanida so‘nggi kunlarda kuchli yog‘ingarchilik kuzatildi. Oqibatida bir nechta oila bedarak yo‘qoldi. Ishkemish tumanida suv toshqini tufayli 10 ta oila, jumladan, ayollar va bolalar izsiz yo‘qolgan. Yangi Qal’a, Farxor va Varsajda esa yetti oilaning qayerdaligi noma’lum.

Yuqoridagi to‘rtta tumanda 7000 gektar qishloq xo‘jaligi yerlari vayron bo‘lgan, 30 bosh chorva moli yo‘qolgan va 23 ta uy zarar ko‘rgan. Ishkemish aholisi “Tolibon”ning tegishli idoralaridan hech qanday yordam olmagani va ochiq joylarda yashayotganini aytmoqda.

Hukumatning Tabiiy ofatlarni boshqarish vazirligi so‘nggi suv toshqinlari oqibatida kamida sakkiz kishi halok bo‘lgani va yana uch kishi jarohatlanganini ma’lum qildi.