Rossiya Markaziy banki rahbari Elvira Nabiullina Davlat dumasi yig‘ilishida o‘z hududida “Mir” kartasidan foydalanishni vaqtincha taqiqlagan davlatlarga nisbatan javob choralarini joriy etish mumkinligini ma’lum qildi.
Yalpi majlisda Davlat Dumasining Xalqaro ishlar bo‘yicha qo‘mitasi raisi o‘rinbosari Irina Rodnina bir qator mamlakatlar, jumladan Qirg‘iziston, Qozog‘iston va O‘zbekistondagi ayrim bank tashkilotlari va to‘lov tizimlari AQSH Moliya vazirligi tomonidan sanksiyalar kiritilganidan so‘ng “Mir” kartalariga to‘liq yoki qisman xizmat ko‘rsatishdan bosh tortganini ta’kidlagan.
Rossiya Markaziy banki rahbari mamlakat moliya sektorida sanksiyalar kuchayib borayotganini aytib, bank moliyaviy infratuzilmani saqlash va rivojlantirish bo‘yicha do‘st davlatlar bilan muloqotni davom ettirayotganini qo‘shimcha qilgan. U muqobil yechimlar tafsilotlarini oshkor qilmagan.
Nabiullinaning fikricha, cheklovlar yoki taqiqlar kabi javob choralarini joriy etish nazariy jihatdan mumkin. Biroq agar davlatlar muqobil yechimlarni topishda hamkorlik qilmasa, ular mamlakatlar bilan munosabatlarda oxirgi chora sifatida ko‘rilishi kerak.
2022-yil 23-sentyabrdan UzCard protsessing markazi O‘zbekistonda “Mir” kartalariga xizmat ko‘rsatishni va xorijda kobrendli UzCard – “Mir” kartalaridan foydalanishni to‘xtatgan edi. Markaz vakillariga ko‘ra, bu qaror to‘lov tizimi ishtirokchilari tomonidagi texnik jarayonlar bilan bog‘liq.
2023-yil yanvar oyida O‘zbekiston Markaziy banki boshqaruvi raisi Mamarizo Nurmuratov O‘zbekiston banklari “Mir” kartalariga xizmat ko‘rsatishni qayta tiklash ustida ish olib borayotganini ma’lum qilgan edi.
Tizimni qayta tiklash imkoniyati banklar uchun xavflar bilan bog‘liq. Texnik sabablarga ko‘ra, sanksiyalar ostida qolmasligi uchun banklarda tizimning ishlashi to‘xtatildi. Bizning banklarimiz bu masala ustida ishlab, OFAC (Xorijiy aktivlarni nazorat qilish idorasi) bilan hamkorlik qilmoqda, – degan edi Nurmatov.
Markaziy bank rahbari kartochkalarga xizmat ko‘rsatishni tiklashning aniq muddatiga aniqlik kiritmagan. Ayni paytda respublikada kartalar hali ham qabul qilinmayapti.
Izoh (0)