Turkiyaning eng yirik banklari İşbank va DenizBank Rossiyaning MIR kartalariga xizmat ko‘rsatishni to‘xtatdi. Bu haqda Bloomberg xabar bermoqda.
Agentlik bu qarorni AQSH sanksiyalari qo‘llanishi mumkinligi fonida qabul qilingan deb hisoblamoqda.
Avvalroq AQSH MIR kartalari tufayli xorijiy banklar uchun sanksiyalar xavfini e’lon qilgandi.
İşbank Turkiyadagi birinchi davlat bankidir. 20 millionga yaqin mijozlarga xizmat ko‘rsatadi, Turkiyada 1205 va xorijda 22 ta filialga ega.
İşbank — 2019-yil aprel oyida Turkiyada birinchi bo‘lib MIR karta xizmatini taqdim etdi. DenizBank’ning Turkiyada 708 ta, boshqa mamlakatlarda 43 ta filiali mavjud.
Bankning mijozlar bazasi 11,8 milliondan ortiq kishini tashkil etadi. Bank MIR kartasi bilan operatsiyalarni may oyidan boshlab amalga oshira boshlagan edi.
15-sentabr kuni AQSH g‘aznachiligi Mir to‘lov tizimidan Rossiyadan tashqarida foydalanishni yo‘lga qo‘yganlik uchun sanksiyalar qo‘llashga tayyorligini ma’lum qildi.
O‘sha kuni Financial Times gazetasi AQSH va Yevropa Ittifoqi Turkiyaga Rossiyaning sanksiyalardan qochishiga yo‘l qo‘ymaslik uchun bosim o‘tkazayotgani haqida xabar berdi.
Nashr ta’kidlashicha, AQSH va Yevropa Ittfioqi Anqarani mamlakat banklarida MIR tizimidan foydalanishni to‘xtatishga chaqirmoqchi.
İşbank va DenizBank’dan tashqari, MIR kartalari bilan operatsiyalar Turkiyaning uchta yirik banklari — VakfBank, Ziraat Bank va Halkbank tomonidan amalga oshiriladi.
MIR kartalari bilan bog‘liq operatsiyalar O‘zbekistonda ham amalga oshiriladi.
Izoh (0)