Россия Марказий банки раҳбари Элвира Набиуллина Давлат думаси йиғилишида ўз ҳудудида “Мир” картасидан фойдаланишни вақтинча тақиқлаган давлатларга нисбатан жавоб чораларини жорий этиш мумкинлигини маълум қилди.
Ялпи мажлисда Давлат Думасининг Халқаро ишлар бўйича қўмитаси раиси ўринбосари Ирина Роднина бир қатор мамлакатлар, жумладан Қирғизистон, Қозоғистон ва Ўзбекистондаги айрим банк ташкилотлари ва тўлов тизимлари АҚШ Молия вазирлиги томонидан санкциялар киритилганидан сўнг “Мир” карталарига тўлиқ ёки қисман хизмат кўрсатишдан бош тортганини таъкидлаган.
Россия Марказий банки раҳбари мамлакат молия секторида санкциялар кучайиб бораётганини айтиб, банк молиявий инфратузилмани сақлаш ва ривожлантириш бўйича дўст давлатлар билан мулоқотни давом эттираётганини қўшимча қилган. У муқобил ечимлар тафсилотларини ошкор қилмаган.
Набиуллинанинг фикрича, чекловлар ёки тақиқлар каби жавоб чораларини жорий этиш назарий жиҳатдан мумкин. Бироқ агар давлатлар муқобил ечимларни топишда ҳамкорлик қилмаса, улар мамлакатлар билан муносабатларда охирги чора сифатида кўрилиши керак.
2022 йил 23 сентябрдан UzCard процессинг маркази Ўзбекистонда “Мир” карталарига хизмат кўрсатишни ва хорижда кобрендли UzCard – “Мир” карталаридан фойдаланишни тўхтатган эди. Марказ вакилларига кўра, бу қарор тўлов тизими иштирокчилари томонидаги техник жараёнлар билан боғлиқ.
2023 йил январь ойида Ўзбекистон Марказий банки бошқаруви раиси Мамаризо Нурмуратов Ўзбекистон банклари “Мир” карталарига хизмат кўрсатишни қайта тиклаш устида иш олиб бораётганини маълум қилган эди.
Тизимни қайта тиклаш имконияти банклар учун хавфлар билан боғлиқ. Техник сабабларга кўра, санкциялар остида қолмаслиги учун банкларда тизимнинг ишлаши тўхтатилди. Бизнинг банкларимиз бу масала устида ишлаб, OFAC (Хорижий активларни назорат қилиш идораси) билан ҳамкорлик қилмоқда, – деган эди Нурматов.
Марказий банк раҳбари карточкаларга хизмат кўрсатишни тиклашнинг аниқ муддатига аниқлик киритмаган. Айни пайтда республикада карталар ҳали ҳам қабул қилинмаяпти.
Изоҳ (0)