Keniyaning ayrim qismlarida kuchli yomg‘irlar kamida 13 kishining hayotiga zomin bo‘ldi va 15,000 ga yaqin kishi uyini tark etdi. Bu haqda Birlashgan Millatlar Tashkiloti axborotiga tayanib, Associated Press xabar berdi.
BMTning gumanitar masalalarni muvofiqlashtirish boshqarmas 11-aprel kuni 20 mingga yaqin odam jabrlanganini aytgan. Mart oyining o‘rtalarida musson mavsumi boshlanganidan beri butun mamlakat bo‘ylab kuchli yomg‘ir va toshqinlar sabab 15 mingga yaqin odam o‘z uyini tashlab ketgan.
Keniya Qizil Xoch jamiyatining ma’lum qilishicha, suv toshqini beshta asosiy yo‘lni, jumladan, Keniya shimolidagi Garissa yo‘lini yopib qo‘ygan. Aholi balandroq joylarga ko‘chirishga chaqirilgan.
Hozirgacha mamlakatning 47 okrugidan to‘qqiztasida suv toshqini haqida xabar berilgan. Markaziy hududlarda ko‘chkilar qayd etilgan. 9-aprel kuni mamlakat g‘arbiy qismidagi Narok tumanida suv toshqini sababli to‘rt kishi halok bo‘lgani aytilgan edi.
Keniya Qizil Xoch jamiyati bosh kotibi Ahmad Idrisga ko‘ra, ko‘chirilgan odamlar va lagerlarda yashovchi odamlarga suv orqali yuqadigan kasalliklarning oldini olish uchun boshpana va toza ichimlik suvini o‘z ichiga olgan yordam taklif qilingan.
Meteorologiya departamenti maʼlumotlariga ko‘ra, yomg‘irli mavsum aprel oyining oxirida eng yuqori cho‘qqisiga chiqishi va iyun oyida pasayishi kutilmoqda.
Izoh (0)