Toshkent shahri Yashnobod tumanida joylashgan “Ashxobod” sayilgohiga o‘rnatilgan charxpalakdan 20 mingga yaqin shar yog‘dirilishi yuzasidan ma’lumot berildi.

Ijtimoiy tarmoqlarda 10-aprel kuni “Ashxobod” sayilgohiga o‘rnatilgan charxpalakdan 20 mingga yaqin shar yog‘dirilishi to‘g‘risida xabarlar tarqaldi. “Gazeta.uz”ning poytaxt ekologiya boshqarmasiga tayanib yozishicha, holat yuzasidan o‘rganish ishlari olib borilgan.

Tashkilotning xabar berishicha, o‘rganishlar natijasida sharlar charxpalakdan emas, yerdan 5 metr balandlikda joylashgan temir balkalardan yog‘dirilishi aniqlangan.

Mas’ullar “bayram arafasida tabiatga va atrof-muhitga zarar yetkazmagan holda ishlarni tashkil etish” to‘g‘risida ogohlantirilgan.

Avvalroq bloger Jahongir Xo‘jayev sharlar aynan charxpalakning eng yuqori qismidan yog‘dirilishini aytgandi. Telegram’dagi “Ekologuz” kanali esa shouda ishlatiladigan bir martalik sharlar ekologiyaga zarar yetkazishi mumkinligidan xavotirlarini bildirgan.

Klivlenddagi ekologik falokat

1986-yilning 27-sentabr kuni soat 13:50 larda Klivlendda 1,5 millionga yaqin havo shari uchirib yuborilib, jahon rekordi o‘rnatilgan edi. Mazkur voqea tashkilotchisi bo‘lgan United Way keyingi bir necha soat, kunlar va haftalar davomida yer tortishish kuchining o‘zgarmas qoidasiga o‘z tajribasida guvoh bo‘lgan: ko‘tarilgan hamma narsa qulashi kerak.

Mazkur holatda sharlar Byork-Leykfront aeroportiga tushib, uchish-qo‘nish yo‘lagini to‘sib qo‘yadi. Medin okrugiga tushgan sharlar otlarni qo‘rqitib yuborgan va natijada otlar egasi tashkilotchilarni sudga berib, kompensatsiya undirishga muvaffaq bo‘lgan. Erik ko‘liga tushgan sharlar sohil xizmati vertolyotiga bedarak yo‘qolgan ikki baliqchini topishga xalaqit bergan, keyinchalik ularning jasadi topilgan, marhumlardan birining ayoli sudga berib, ishni yutib chiqqan.