Telegram messenjeridagi kanallarda Toshkent shahrining Shayxontohur tumanida joylashgan Paxtakor stadioni va Alisher Navoiy kinoteatri o‘rtasida savdo markazi qurilayotgani, shu sabab mavjud “stoyanka” buzilib, hududdagi daraxtlar kesilishi taxmin qilingani aytilgan videolar tarqalgandi.
“Daryo” jurnalisti holatga aniqlik kiritish maqsadida voqea joyiga borib, o‘rganish olib bordi.
“Stoyanka” atrofida kabel o‘rnatish ishlarini olib borayotgan Shayxontohur tuman elektr tarmoqlari korxonasi xodimlarining bildirishicha, hududda avtomobillar uchun zamonaviy turargoh, shuningdek savdo markazi qurilishi mumkin.
-B6lECgn4.jpg)
Bundan ortig‘ini bilmaymiz. Tashkilotimizga murojaat qilishib, shu yerda kabel o‘tkazishimiz so‘ralgan ekan. Shu ishlar bilan mashg‘ulmiz, — deydi jurnalist bilan muloqotda bo‘lgan ishchilar.
O‘zining Abbos ismli quruvchi ekanini tasdiqlagan suhbatdosh jamoatchilikning hududda savdo markazi qurilishi mumkinligi haqidagi taxminini tasdiqladi.
Ha, hududda savdo markazi quriladi. Faqat birorta ham daraxtni kesmaslik sharti bilan. Ko‘pchilik buni har xil talqin qilib, endi “stoyanka” buzilar ekan, daraxtlar kesilar ekan degan ma’lumotlarni tarqatishmoqda, — deydi Abbos ismli suhbatdosh.
Quruvchining aytishicha, tarmoqlarda tarqalgan videolardan so‘ng mas’ullar, xususan Toshkent shahar Kadastrlar palatasi mas’ullari, shahar Ekologiya boshqarmasi xodimlari hududga kelib, vaziyatni o‘rgangan.
Bizda qonuniy ruxsatnoma bor. O‘sha videolar tarqalgach, yonimizdagi kadastr xodimlari, shahar Ekologiya boshqarmasi xodimlari bu yerga kelib, holatni o‘rganishdi. Bizda qonuniy ruxsat borligini ko‘rishdi va qaytib ketishdi, — deydi suhbatdosh.
Mas’ulning ma’lumot berishicha, savdo markazi eski “stoyanka” o‘rnida 20 sotix maydonda qurilishi rejalashtirilgan.
Bu yerda savdo markazi qurilishiga ruxsat berilayotgan paytda bizga eski “stoyanka” o‘rniga zamonaviy, aholi uchun bepul turargoh qurib berish majburiyatini yuklashgan. To‘g‘ri, biz savdo markazi uchun ham pulli “stoyanka” quramiz. Savdo markazida 2 ta “stoyanka” bo‘ladi. Biri bepul bo‘lib, eski “stoyanka” o‘rnida odamlarga beriladi, — deydi hududda qurilish ishlarini boshlaganini aytgan mas’ul.
Jurnalist bilan muloqotga kirishgan mas’ul hududda qurilish ishlarini olib borishi uchun tegishli tashkilotlarning qarori, ruxsatnomasi borligini aytar ekan, ulardan nusxalar ham taqdim qilishini bildirdi. Biroq va’da qilingan fursat o‘tsa-da, hech qanday hujjat ko‘rsatilmadi.
Men aslida quruvchiman. OAVga hujjat taqdim etish masalasida buyurtmachiga bildirdim. Ulardan ruxsat so‘rashim kerak. Menga hujjatlar taqdim etishga ruxsat berishsa, sizlarga albatta hujjatlarni taqdim qilamiz, — deydi Abbos ismli suhbatdosh.
Quruvchi savdo markazi qurilishiga buyurtma bergan tomonni hozircha ochiqlamadi.
“Daryo” voqea tafsilotlarini o‘rganishda davom etadi.
Izoh (0)