Тошкент шаҳри Яшнобод туманида жойлашган “Ашхобод” сайилгоҳига ўрнатилган чархпалакдан 20 мингга яқин шар ёғдирилиши юзасидан маълумот берилди.

Ижтимоий тармоқларда 10 апрель куни “Ашхобод” сайилгоҳига ўрнатилган чархпалакдан 20 мингга яқин шар ёғдирилиши тўғрисида хабарлар тарқалди. “Газета.уз”нинг пойтахт экология бошқармасига таяниб ёзишича, ҳолат юзасидан ўрганиш ишлари олиб борилган.

Ташкилотнинг хабар беришича, ўрганишлар натижасида шарлар чархпалакдан эмас, ердан 5 метр баландликда жойлашган темир балкалардан ёғдирилиши аниқланган.

Масъуллар “байрам арафасида табиатга ва атроф-муҳитга зарар етказмаган ҳолда ишларни ташкил этиш” тўғрисида огоҳлантирилган.

Аввалроқ блогер Жаҳонгир Хўжаев шарлар айнан чархпалакнинг энг юқори қисмидан ёғдирилишини айтганди. Telegram’даги “Экологуз” канали эса шоуда ишлатиладиган бир марталик шарлар экологияга зарар етказиши мумкинлигидан хавотирларини билдирган.

Кливленддаги экологик фалокат

1986 йилнинг 27-сентябрь куни соат 13:50 ларда Кливлендда 1,5 миллионга яқин ҳаво шари учириб юборилиб, жаҳон рекорди ўрнатилган эди. Мазкур воқеа ташкилотчиси бўлган United Way кейинги бир неча соат, кунлар ва ҳафталар давомида ер тортишиш кучининг ўзгармас қоидасига ўз тажрибасида гувоҳ бўлган: кўтарилган ҳамма нарса қулаши керак.

Мазкур ҳолатда шарлар Бёрк-Лейкфронт аэропортига тушиб, учиш-қўниш йўлагини тўсиб қўяди. Медин округига тушган шарлар отларни қўрқитиб юборган ва натижада отлар эгаси ташкилотчиларни судга бериб, компенсация ундиришга муваффақ бўлган. Эрик кўлига тушган шарлар соҳил хизмати вертолётига бедарак йўқолган икки балиқчини топишга халақит берган, кейинчалик уларнинг жасади топилган, марҳумлардан бирининг аёли судга бериб, ишни ютиб чиққан.