Ukraina energetika vaziri German Galushchenko Rossiya Ukrainadagi anʼanaviy elektr stansiyalarining 80 foiziga hujumlar uyushtirganini maʼlum qildi. Bu haqda The Moscow Times nashri xabar berdi.
Manbada aytilishicha, anʼanaviy tipdagi elektr stansiyalarining qariyb to‘rtdan uch qismi, gidroelektr stansiyalarining yarmidan ortig‘i Rossiya tomonidan nishonga olingan. Oqibatda esa Ukrainaning qator hududlarida tizimli ravishda elektr uzilishlari kuzatilmoqda.
Moskva mart oyi oxiridan beri Ukraina elektr tarmoqlariga deyarli har kuni zarbalar berib, mamlakat shimoli-sharqidagi Xarkov shahrida katta elektr o‘chirilishlariga sabab bo‘lmoqda. Tezkor brigadalar hujum oqibatlarini bartaraf etish uchun hududda tun-u kun ishlamoqda.
“IES ishlab chiqarishi 80 foizgacha hujumga uchragan. GESlarning yarmidan ko‘pi avariya holatida. Bu Ukrainaning energetika sektoriga urush boshlanganidan beri qilingan eng yirik hujumdir”, — degan German Galushchenko.
Ukrainada IESlar mamlakatning elektrga bo‘lgan ehtiyojining asosiy qismini taʼminlab beradi. Nisbatan pastroq hissa esa GESlar ulushiga to‘g‘ri keladi. Zaporojyeda joylashgan mamlakatdagi eng yirik atom elektr stansiyasi esa urush boshlanganidan beri Rossiya nazorati ostida qolmoqda.
Galushchenkoning taʼkidlashicha, energiya tuzilmasiga so‘nggi hujumlarning ko‘lami va taʼsiri 2023-yilning qishida millionlab odamlarni elektr va isitish vositalarisiz qoldirgan hujumlarga qaraganda ancha kattaroq.
Izoh (0)