Ukraina prezidenti Vladimir Zelenskiy kredit evaziga AQSHdan qurol olishga tayyor ekanliklarini aytdi. Bu haqda u “Biz — Ukraina” telekanaliga bergan intervyusida ma’lum qildi.
Zelenskiy Amerikaning harbiy yordamini “o‘ta muhim” deb atadi va Ukraina “mamlakatdagi vaziyatning garoviga” aylanganini bildirdi.
“Afsuski, Rossiyaning Ukrainaga qarshi urushi AQSHda ichki siyosiy masalaga aylandi, garchi bu butun dunyo xavfsizligiga aloqador”, — dedi siyosatchi.
U agar AQSH Kiyevga harbiy yordamni “bugun kreditga” yoki “bir yildan keyin tekinga” taklif qilsa, birinchi variantni tanlashini ta’kidladi:
“Bu yerda tanlov yo‘q, qanchalik tezroq bo‘lsa, shuncha yaxshi”, — dedi Zelenskiy.
Shuningdek, Ukraina prezidenti “mamlakat havo hududini butunlay yopish uchun” 25 ta Patriot havo hujumidan mudofaa tizimi yetishmasligini aytdi.
“Aynan Patriot Rossiyaning so‘nggi haftalardagi ommaviy hujumlarida Ukrainaning energiya tizimini himoya qilishga yordam beradi”, — deydi u.
Fransiya harbiylari qanday holatda Ukrainaga kelishi mumkin?
Bundan tashqari Zelenskiy intervyuda fransuz hamkasbi Emmanuel Makronning Ukrainaga qo‘shin yuborish tashabbusini qo‘llab-quvvatladi.
Uning so‘zlariga ko‘ra, xorijiy harbiylar ayniqsa ikki yo‘nalishda foyda keltirishi mumkin: Ukraina armiyasini tayyorlash va ishdan chiqqan G‘arb harbiy texnikasini ta’mirlashda. Shu bilan birga, Zelenskiy xorijiy armiyalarni ochiqchasiga urushda ishtirok etishga chaqirishga tayyor emasligini, chunki bu holda Rossiya imkoniyatdan foydalanishi va “boshqa davlatlarning harbiy yordamini to‘xtatishi uchun hamma narsani qilishini” ta’kidladi.
Makronning Ukrainaga qo‘shin yuborish tashabbusi
26-fevral kuni Makron Yevropa davlatlari rahbarlari bilan uchrashuvdan so‘ng Ukrainaga qo‘shin kiritilishi ehtimolini rad etmadi. U bu Kiyevni qo‘llab-quvvatlash variantlaridan biri ekanini ta’kidlagan. Makronning tashabbusi Buyuk Britaniya, Vengriya, Italiya, Slovakiya, Chexiya va Shvetsiya tomonidan qo‘llab-quvvatlanmagan.
Kreml bu holatda “biz Rossiya va NATO o‘rtasidagi to‘g‘ridan to‘g‘ri to‘qnashuv ehtimoli haqida emas, balki muqarrarligi haqida gapirishimiz kerak” deya munosabat bildirdi. NATO bosh kotibi Yens Stoltenberg alyans Ukrainaga o‘z qo‘shinlarini yuborishni rejalashtirmayotganini aytdi.
Izoh (0)