Turkiya prezidenti Rajab Toyyib Erdo‘g‘on qarori bilan Tojikiston fuqarolari uchun vizasiz rejim bekor qilindi. Tojikiston Tashqi ishlar vazirligi rasmiysi bunga munosabat bildirdi. Bu haqda AsiaPlus xabar berdi.
Tojikiston Tashqi ishlar vazirligi matbuot kotibi Shoxin Samadiy 6-aprel kuni Turkiya tomonidan viza rejimi joriy qilingani haqida hech qanday xabar olinmaganini aytdi.
“Xalqaro amaliyotga ko‘ra, Turkiya tomoni Tojikiston fuqarolari uchun viza rejimi joriy etiladigan sana haqida tojik tomonini oldindan xabardor qilishi kerak edi. Taʼkidlaymizki, Tojikiston tomoni hozircha diplomatik kanallar orqali bunday maʼlumot olmagan”, — dedi u.
Samadiy erta ogohlantirishdan kelib chiqib vazirlik Turkiyaga boradigan fuqarolariga safar uchun zarur hujjatlarni tayyorlashni tavsiya qilishini aytdi.
“Uchinchi davlatlarga sayohat qilish uchun tranzit sifatida Turkiya yo‘nalishidan foydalanishni rejalashtirayotgan Tojikiston fuqarolariga Turkiya hududi orqali emas, balki boshqa sayohat yo‘nalishlarini ko‘rib chiqish tavsiya etiladi”, — dedi rasmiy.
U Tojikiston tomoni o‘zaro munosabatlar tamoyiliga muvofiq Turkiya fuqarolari uchun viza rejimini joriy etish masalasini ko‘rib chiqishini ta’kidladi.
7-aprel kuni esa Tojikiston Tashqi ishlar vazirligi 6-aprel kuni Turkiya tomoni diplomatik kanallar orqali ushbu chora haqida rasman xabardor qilganini bildirdi. Unga ko‘ra, Tojikiston fuqarolari uchun 20-apreldan Turkiyaga borishda viza talab etiladi. Bungacha Tojikiston fuqarolari Turkiyada 90 kungacha vizasiz yurishlari mumkin edi.
22-mart kuni Moskva viloyatidagi Crocus City Hall’da yuz bergan teraktdan so‘ng, Turkiya hujum uchun mas’uliyatni o‘z zimmasiga olgan ISHID tarafdorlariga qarshi reydlar o‘tkazdi. Crocus’dagi teraktda ayblanayotganlar asosan Tojikiston fuqarolari sanaladi.
ISHID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)