Туркия президенти Ражаб Тоййиб Эрдўғон қарори билан Тожикистон фуқаролари учун визасиз режим бекор қилинди. Тожикистон Ташқи ишлар вазирлиги расмийси бунга муносабат билдирди. Бу ҳақда AsiaPlus хабар берди.
Тожикистон Ташқи ишлар вазирлиги матбуот котиби Шохин Самадий 6 апрель куни Туркия томонидан виза режими жорий қилингани ҳақида ҳеч қандай хабар олинмаганини айтди.
“Халқаро амалиётга кўра, Туркия томони Тожикистон фуқаролари учун виза режими жорий этиладиган сана ҳақида тожик томонини олдиндан хабардор қилиши керак эди. Таъкидлаймизки, Тожикистон томони ҳозирча дипломатик каналлар орқали бундай маълумот олмаган”, — деди у.
Самадий эрта огоҳлантиришдан келиб чиқиб вазирлик Туркияга борадиган фуқароларига сафар учун зарур ҳужжатларни тайёрлашни тавсия қилишини айтди.
“Учинчи давлатларга саёҳат қилиш учун транзит сифатида Туркия йўналишидан фойдаланишни режалаштираётган Тожикистон фуқароларига Туркия ҳудуди орқали эмас, балки бошқа саёҳат йўналишларини кўриб чиқиш тавсия этилади”, — деди расмий.
У Тожикистон томони ўзаро муносабатлар тамойилига мувофиқ Туркия фуқаролари учун виза режимини жорий этиш масаласини кўриб чиқишини таъкидлади.
7 апрель куни эса Тожикистон Ташқи ишлар вазирлиги 6 апрель куни Туркия томони дипломатик каналлар орқали ушбу чора ҳақида расман хабардор қилганини билдирди. Унга кўра, Тожикистон фуқаролари учун 20 апрелдан Туркияга боришда виза талаб этилади. Бунгача Тожикистон фуқаролари Туркияда 90 кунгача визасиз юришлари мумкин эди.
22 март куни Москва вилоятидаги Crocus City Hall’да юз берган терактдан сўнг, Туркия ҳужум учун масъулиятни ўз зиммасига олган ИШИД тарафдорларига қарши рейдлар ўтказди. Crocusъдаги терактда айбланаётганлар асосан Тожикистон фуқаролари саналади.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан “террорчилик ташкилоти” деб топилган.
Изоҳ (0)