Turkiyada terakt uyushtirishda gumonlangan ikki markaziy osiyolik ushlandi (video)

Turkiyada ISHID nomidan terakt uyushtirishda gumonlanib, Qirg‘iziston va Tojikiston fuqarosi qo‘lga olindi. Bu haqda Hurriyet nashri xabar berdi.

Ayblanuvchilar 37 yoshli Foziljon A. (Tojikiston fuqarosi) va 41 yoshli Zulfiya S. (Qirg‘iziston fuqarosi) hisoblanadi. Ayol Turkiyadan deportatsiya qilingan. Tintuv davomida gumonlanuvchilardan jandarmeriya kiyimi, politsiya jileti va furashka, avtomobil ratsiyasi, shuningdek, yo‘riqnomasi bo‘lgan elektron materiallar topilgan. Huquq-tartibot idoralari maʼlumotlariga ko‘ra, teraktga tayyorgarlik ko‘rilgan.

Xavfsizlik kuchlari Foziljonning ISHID a’zosi ekani va terrorchilar orasida “Abu Ismoil” taxallusi bilan tanilganini ham aniqladi. Razvedka xizmatlari unga rejalashtirilgan teraktning tashkilotchisi va koordinatori rolini yuklamoqda.

Eslatib o‘tamiz, avvalroq ISHID terrorchilik guruhiga aʼzolikda gumon qilingan 51 kishi qo‘lga olingandi. Tintuvlar chog‘ida terrorchilik guruhlariga tegishli ko‘plab hujjatlar musodara qilingan. Shunga o‘xshash operatsiyalar Turkiyada muntazam ravishda amalga oshiriladi.

ISHID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.