Moskvada tojikistonlik migrantlar uylaridan chiqmaslikka harakat qilmoqda, chunki Crocus’dagi terakt tufayli ular deportatsiya yoki Ukrainaga qarshi urushga ommaviy yuborilishidan qo‘rqmoqda. Bu haqda The New York Times xabar berdi.
Moskva viloyatidagi hujumda qo‘lga olingan to‘rt nafar gumonlanuvchi Tojikistondan bo‘lgani sababli Rossiyada internetda migrantlarga qarshi chiqishlar kuchaygan. Ksenofobiya Ukrainaga bostirib kirish tarafdorlari hisoblangan harbiy blogerlarning ommaviy sahifalarida faol tarqala boshlagan.
Natijada Kreml muhojirlarga nisbatan qattiqroq choralar ko‘rish, urush tarafdorlarining talablarini inobatga olishga harakat qilmoqda. Shu bilan birga, jamiyatda millatlararo ziddiyat avj olishining oldini olishga urinmoqda.
Rossiya hukumati statistikasiga ko‘ra, o‘tgan yili Tojikistonning bir millionga yaqin fuqarosi Rossiyada mehnat muhojiri sifatida ro‘yxatga olingan. Moskvadagi tojikistonliklar ishlayotgan oziq-ovqat korxonasi menejerining NYT’ga aytishicha, bu kayfiyat 2000-yillarni eslatadi, o‘shanda Kavkazdan kelgan musulmonlar terror xurujlari va Chechenistondagi urushdan keyin keng tarqalgan diskriminatsiyaga uchragan.
“Moskvadagi tojikistonliklar shu qadar qo‘rqqanki, ko‘chaga deyarli chiqishmaydi”, — deydi u.
“Ular nafaqat deportatsiyadan, balki Ukrainadagi urushga jalb etilishidan, Rossiya hukumati tojik xalqiga qarshi qasos sifatida ularni ommaviy ravishda frontga yuborishidan qo‘rqadi”, — deydi yaqinda Moskvani tark etgan tojikistonlik huquq himoyachisi 25 yoshli Saidanvar.
Teraktlardan keyin tojikistonliklar Rossiyaga kamroq tashrif buyurmoqda, avval sotib olingan chiptalar qaytarilmoqda. Chipta xaridlari 20-30 foizga kamaygan.
Izoh (0)