Turkiya maxsus xizmatlari maxsus operatsiya o‘tkazib, ISHID tashkilotiga aloqadorlikda gumon qilingan 48 nafar shaxsni hibsga oldi. Bu haqda Anadolu nashri xabar berdi.
Manbada aytilishicha, hibsga olinganlar Santa-Mariya cherkoviga uyushtirilgan hujumga aloqadorlikda ham ayblanmoqda. Bu haqda rasman Ichki ishlar vazirligi bayonot bergan.
Rasmiylar butun mamlakat bo‘ylab aksilterror operatsiyalar davom etayotganini maʼlum qilgan. Hibsga olishlar soni ortishi mumkinligi aytilgan.
“ISHID terrorchilik tashkilotiga qarshi olib borilgan operatsiyalarda 28-yanvar kuni Istanbuldagi Santa-Mariya cherkoviga uyushtirilgan hujumga aloqador bo‘lgan 48 nafar gumondor qo‘lga olindi”, — deb xabar bergan Turkiya ichki ishlar vaziri Ali Yerlikaya.
Xabarda aytilishicha, hali dalillar topilmaganiga qaramay, Turkiya rasmiylar cherkovda sodir etilgan teraktni ISHID faoliyati bilan bog‘lamoqda. “Bozdogon-21” operatsiyasi ularning aloqalarini to‘la fosh etish uchun Istanbul va Anqara politsiya bo‘limlari tomonidan Xavfsizlik razvedka boshqarmasi va terrorizmga qarshi kurash boshqarmasi bilan hamkorlikda amalga oshirilmoqda.
Mahbuslarning 30 nafari Istanbulda ushlangan. Yana 18 nafari esa Anqaradagi tezkor tadbirlarda hibsga olingan.
Maʼlumot o‘rnida, joriy yilning 28-yanvar kuni Istanbulning Sariyer tumanidagi Santa-Mariya cherkoviga uyushtirilgan qurolli hujumni ISHID terrorchi guruhi o‘z zimmasiga olgan edi. Hujum natijasida 52 yoshli Tunjer Jihan halok bo‘lgan.
Izoh (0)