AQSH Rossiyani aynan Crocus’da terakt bo‘lishidan ogohlantirgan — WP
AQSH Rossiyani aynan Crocus City Hall’da terakt yuz berishi mumkinligidan ogohlantirgandi. Bu haqda Amerika hukumati doiralaridagi anonim manbalarga tayanib, The Washington Post xabar berdi.
Foto: Euromaidan press
Manbalarga ko‘ra, ISHID tomonidan kutilayotgan terakt haqidagi ogohlantirish 6-mart kuni Rossiyaga taqdim etilgan. Unda aynan Crocus’ga hujum qilinishi kutilayotgani aytilgan. Ertasi kuni Amerikaning Moskvadagi elchixonasi o‘z fuqarolarini hujum tahdidi haqida ogohlantirib, “konsertlar” hujumning ehtimoliy nishoni bo‘lishini ta’kidlagan.
2-aprel kuni Rossiya Tashqi razvedka xizmati rahbari Sergey Narishkin Federal xavfsizlik xizmati (FXX) Amerika razvedkasidan “aniq ma’lumotlar” olganini, ammo “ma’lumotlar juda umumiy bo‘lib, bu dahshatli jinoyat sodir etishda ishtirok etganlarni to‘liq aniqlashga imkon bermagani”ni aytgandi.
Amerika razvedka idoralari yaqinlashib kelayotgan teraktlar haqida olgan ma’lumotlarini hatto dushman davlatlar bilan ham baham ko‘radi, masalan, ular Eronni yanvar oyida ISHID Kermanda hujumga tayyorgarlik ko‘rayotgani haqida ogohlantirgan, — deydi anonim manba.
3-yanvar kuni Eron janubi-sharqidagi Kerman shahrida Qosim Sulaymoniy vafotining to‘rt yilligi xotirasiga bag‘ishlangan motam marosimlari chog‘ida terakt yuz bergandi. Oqibatda 95 kishi halok bo‘lgan, 211 kishi jarohatlangandi.
AQSH tomonidan yaqinlashib kelayotgan hujumlar tafsilotlari kamdan-kam xabar qilinadi, chunki bu razvedka ma’lumotlarini yig‘ish manbalari va usullarini oshkor qilishga olib kelishi mumkin, deydi Washington Post manbalari va ekspertlari.
Crocus’dagi terakt
Moskva viloyati Crocus City Hall’dagi terakt 22-mart kuni kechqurun sodir bo‘ldi. Bir necha qurollangan kishi konsert zali binosiga bostirib kirib, olomonni otib tashlagan, keyin esa binoni yoqib yuborgan. Terakt oqibatida 143 kishi halok bo‘lgan, yuzlab odamlar jarohatlangan. Hujumni sodir etishda Tojikistonning to‘rt nafar fuqarosi ayblangan, sud ular aybiga iqror bo‘lganini ma’lum qilgan.
Mazkur holatdan keyin Rossiyada migrantlarga nisbatan munosabat o‘zgargan. Tojikiston prezidenti hujumni “sharmandali va dahshatli voqea” deb atagan hamda ota-onalarni farzandlari tarbiyasiga jiddiyroq e’tibor qaratishga chaqirgan.
O‘z navbatida, Rossiya tergovchilari terakt ishtirokchilarining oilasini so‘roq qilish uchun Tojikistonga borgan. Shundan keyin Vahdat shahrida yashovchi to‘qqiz nafar tojikistonlik Crocus’dagi terakt ijrochilari bilan aloqadorlikda ayblanib, qo‘lga olingan. Hibsga olinganlar ISHID bilan aloqada bo‘lganlikda ham gumon qilinmoqda.
Dog‘istonda ham aksilterror operatsiya o‘tkazilib, to‘rt nafar Tojikiston fuqarosi ushlangan. Ular teraktning asosiy ishtirokchilarini qurol va pul bilan ta’minlagani aytilmoqda. Rossiya Tashqi ishlar vazirligi Ukraina hukumatini rasman Crocus City Hall’dagi teraktda ayblagan. Ukraina rasman mazkur ayblovlarni rad etgan. O‘z navbatida, ISHIDning Afg‘onistondagi bo‘limi “Viloyati Xuroson” ushbu hujum uchun javobgarlikni o‘z zimmasiga olishini bir necha bor ta’kidlagan.
ISHID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)