AQSH va Buyuk Britaniya Tashqi ishlar vazirliklari o‘z fuqarolarini yaqin ikki kun ichida Moskvadagi odamlar gavjum joylarda teraktlar sodir etilishi xavfidan ogohlantirdi. Latviya, Kanada, Janubiy Koreya, Shvetsiya, Germaniya va Chexiya ogohlantirishga qo‘shildi. Bu haqda Euronews xabar berdi.
“Elchixona ekstremistlarning Moskvadagi gavjum joylarga, jumladan, konsertlarga hujum qilish rejalari haqidagi xabarlarni kuzatib boradi. AQSH fuqarolariga 48 soat davomida odamlar to‘plangan joydan qochish tavsiya etiladi”, — deyiladi AQSHning Moskvadagi elchixonasi bayonotida.
Buyuk Britaniyaning Rossiyadagi elchixonasi fuqarolariga Rossiyaga har qanday tashrifdan tiyilishni maslahat bergan.
Ogohlantirish Rossiya Federal xavfsizlik xizmati Moskvadagi sinagogalarga hujum qilishni rejalashtirgan “Islomiy davlat” (ISHID) terrorchilik guruhining yacheykasini zararsizlantirganini ma’lum qilganidan bir necha soat o‘tib berilgan.
AQSHning Rossiyadagi elchixonasi tahdidning mohiyati haqida qo‘shimcha ma’lumot bermagan, biroq atrofdagilardan ogoh bo‘lishlari kerakligi ta’kidlangan. Latviya, Kanada, Janubiy Koreya, Shvetsiya, Germaniya va Chexiya yaqin ikki kun ichida Moskvadagi teraktlar xavfi haqidagi ogohlantirishga qo‘shilgan, deb yozadi DW.
Izoh (0)