Rossiya prezidenti Vladimir Putin nima uchun 143 kishi halok bo‘lgan fojia joyiga, ya’ni Crocus City Hall’ga haligacha bormaganing sababi aytildi. Bu haqda prezident matbuot kotibi Dmitriy Peskovga tayanib, “TASS” xabar berdi.
Peskovning so‘zlariga ko‘ra, Crocus City Hall’dagi teraktdan so‘ng birinchi daqiqalardanoq odamlarni qutqarish va yordam ko‘rsatish bo‘yicha barcha choralar ko‘rilgan.
“Rossiya prezidenti Vladimir Putin xodimlar ishiga xalaqit bermaslik uchun fojia joyiga kelmadi”, — dedi Peskov.
U teraktning dastlabki daqiqalaridanoq Moskva viloyati gubernatori Andrey Vorobyov boshchiligidagi barcha tegishli xizmatlar odamlarni qutqarish, jabrlanganlarga tibbiy yordam ko‘rsatish va yong‘inni o‘chirish bo‘yicha choralar ko‘rganini aytdi.
“Albatta, hozirda qandaydir tanishuv safarlarini o‘tkazish mutlaqo nomaqbul, chunki bu voqea joyida tashkil etilgan shtab-kvartira ishiga xalaqit beradi”, — deb javob berdi Kreml matbuot kotibi.
Crocus’dagi terakt
Crocus City Hall’dagi terakt 22-mart kuni kechqurun sodir bo‘ldi. Bir necha qurollangan kishi konsert zali binosiga bostirib kirib, olomonni otib tashlagan, keyin esa binoni yoqib yuborgan. So‘nggi ma’lumotlarga ko‘ra, terakt oqibatida143 kishi halok bo‘lgan, 360 kishi jarohatlangan. Hujumni sodir etishda Tojikistonning to‘rt nafar fuqarosi ayblangan, sud ular aybiga iqror bo‘lganini ma’lum qilgan.
Mazkur holatdan keyin Rossiyada migrantlarga nisbatan munosabat o‘zgargan. Putin boshchiligida Rossiya rasmiylari Ukrainani mazkur teraktga aloqadorlikda ayblagan. Ukraina voqeaga aloqadorligini rad etgan. G‘arb davlatlari, jumladan AQSH, Buyuk Britaniya va Germaniya boshidanoq Ukrainaning Crocus teraktiga hech qanday aloqasi yo‘qligini ta’kidlagan.
Moskva viloyatidagi Crocus City Hall konsert zalida uyushtirilgan ommaviy qirg‘in uchun javobgarlikni “ISHID – Viloyat Xuroson” terrorchilik guruhi o‘z zimmasiga olgani aytilmoqda. AQSH Davlat departamenti mamlakat razvedka xizmatlariga tayanib, bu iqrorni haqiqiy deb hisoblagan.
ISHID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)