Rossiya Tergov qo‘mitasi Basmanniy sudidan Crocus City Hall‘dagi terakt ishi bo‘yicha yana uch nafar ayblanuvchini hibsga olishni so‘radi. Bu haqda “RIA Novosti” xabar berdi.
Sudga taqdim etilgan materiallarga ko‘ra, ayblanuvchilar ikki aka-uka Aminchon, Dilovar va ularning otasi Isroil Islomovlardir. Ayblanuvchilarning teraktdagi bevosita roli haligacha noaniq. Ular 22-mayga qadar qamoqda saqlanadi.
“Novaya gazeta Yevropa” nashrining yozishicha, ayblanuvchilardan biri terakt sodir etganlar qochishga uringan “Renault” avtomobilining so‘nggi egasidir. Uning o‘zi mashinani “taxminan bir hafta oldin” xotinining ukasiga sotganini aytmoqda.
23-mart kuni Federal xavfsizlik xizmati terakt sodir etishda gumon qilinib, 11 kishi hibsga olingani haqida xabar bergandi. Ulardan to‘rt nafari – Dalerjon Mirzoyev, Saidakrami Rachabalizoda, Muhammadsobir Fayzov va Shamsiddin Fariduni (Tojikiston fuqarolari) teraktning bevosita ijrochilari bo‘lgan.
Ular 24-mart kuni kechqurun hibsga olingan. Qolgan yetti nafar hibsga olinganlar kimligi haqida hozircha maʼlumot berilmagan. Crocus’ga qilingan hujum natijasida 137 kishi halok bo‘lgan (“Baza” norasmiy maʼlumotlarga tayanib, qurbonlar soni 144 kishini tashkil etishini aytmoqda). Favqulodda vaziyatlar vazirligi saytida halok bo‘lganlarning dastlabki ro‘yxati e’lon qilingan, unda 68 kishining familiyasi ko‘rsatilgan.
Moskva viloyati sog‘liqni saqlash vazirligi maʼlumotlariga ko‘ra, 182 kishi jarohat olgan. Teraktdan keyin 97 kishi shifoxonalarda qolmoqda. Terakt sodir bo‘lgan kuni Crocus’da qancha odam bo‘lgani noma’lum.
Izoh (0)