AQSHning sobiq prezidenti Donald Tramp Nyu Yorkdagi firibgarlik ishi bo‘yicha 175 million dollar garov pulini to‘ladi, deya BBC xabar berdi.
Ma’lum bo‘lishicha, shu tariqa u mol-mulkini musodara bo‘lishidan qutulib qolgan. Avvalroq Nyu York sudi Trampning garov pulini 464 million dollar qilib belgilagan, biroq apellyatsiya natijasida u sezilarli darajada kamaytirilgan edi.
Fevral oyida sud Trampni qasddan moliyaviy firibgarlikda aybdor deb topgan. Qarorda aytilishicha, sobiq prezident banklarni chalg‘itish va kredit shartlarini yaxshilash maqsadida o‘n yil davomida o‘z boyligini oshirib ko‘rsatgan.
Oq uyga yana Respublikachilar partiyasidan nomzodini qo‘ygan Tramp barcha ayblovlarni asossiz deb hisoblagan. Tramp sud qarori ustidan apellyatsiya bergan, u rad etilgan taqdirda, sobiq prezident 464 millionni to‘liq to‘lashi kerak bo‘lar edi.
Bungacha Trampning advokatlari u soliq to‘lash uchun bunday miqdorni topa olmasligini aytgan. Agar Tramp 175 million dollar garov pulini to‘lay olmaganda, uning barcha mulklari, jumladan Manhettendagi Trump Tower osmono‘par binosi va Floridadagi Mar-a-Lago mulki musodara qilinishi mumkin edi.
15-aprel kuni Manhettenda uning jinoiy ishlaridan biri bo‘yicha birinchi sud majlisi boshlanishi rejalashtirilgan. Tramp Vashingtonda qo‘zg‘olon uyushtirishga urinish, Jorjiyadagi prezidentlik saylovlari natijalarini bekor qilish va prezidentlik davrida maxfiy hujjatlarni saqlash qoidalarini buzganlikda ham ayblanmoqda.
Izoh (0)