Isroil havo kuchlari 29-mart tongida Suriyaning Halab shahri yaqinidagi obyektlarga hujum uyushtirdi. Bu haqda CNN nashri xabar berdi.
Xabarda aytilishicha, hujum oqibatida tinch aholi va harbiy xizmatchilar orasida qurbonlar bo‘lgan. Jarohatlanganlar yaqin atrofdagi kasalxonalarga joylashtirilgan.
SANA agentligi xabar berishicha, Isroil harbiy samolyotlari mahalliy vaqt bilan soat 01:45 atrofida Halab janubi-sharqidagi Atriya yo‘nalishidan hujum boshlagan. Turar joy inshootlari, kuzatuv mayoqlari va davlat muassasalari nishonga olingan.
Bir qancha nashrlar hujum yuzasidan Isroildan izoh so‘ragan. Tel-Aviv rasmiylari holat yuzasidan munosabat bildirmagan.
7-oktyabrda Isroil va HAMAS keskinligi boshlanishi ortidan, Tel-Aviv hukumati Suriya hududidagi qarshilik fronti nuqtalariga ham hujumlar tashkil etdi. Hujumlar, asosan, Jo‘lan tepaligi ortidagi Suriya hududlari, poytaxt Damashq atrofidagi harbiy inshootlarga qaratilgan edi.
Izoh (0)