O‘zbekistonda avtomobillarga toifa stikerlari bepul beriladi

O‘zbekistonda avtomobillarga ekologik toifalariga qarab “yashil“, “sariq” va “qizil” stikerlar bepul beriladi. Bu haqda O‘zA ma’lum qildi. 

Unga ko‘ra, Vazirlar Mahkamasining 2024-yil 29-martdagi “Atmosfera havosiga transport vositalarining salbiy ta’sirini kamaytirish bo‘yicha chora-tadbirlar to‘g‘risida”gi 169-sonli qarori qabul qilindi.

Qarorga asosan, 2024-yil 1-iyundan boshlab barcha toifadagi avtomototransport vositalaridan ifloslantiruvchi moddalar tashlamalarining atmosfera havosiga zararli ta’siri bo‘yicha yo‘l qo‘yiladigan normativlarga mosligini nazorat qilish bo‘yicha “Ekologik transport” tizimi bosqichma-bosqich joriy etiladi.

Diagnostik tekshiruv natijalariga asosan transport vositalariga qalbakilashtirishdan himoyalangan va elektron belgiga ega stikerlar beriladi. Shunga ko‘ra, transport vositalari “yashil”, “sariq” va “qizil” ranglar bilan belgilanadigan “toza”, “o‘rta” va “zararli” ekologik toifalarga bo‘linadi.

Diagnostik tekshiruvlar va stikerlar berish bepul amalga oshiriladi.