Bahorda Toshkent shahrida ikki marta rejalashtirilgan issiq suv taʼminotida uzilishlar bo‘ladi. Bu haqda Veolia Energy Tashkent kompaniyasi xabar berdi.
Qayd etilishicha, bahorda Veolia Energy Tashkent kompaniyasi tomonidan bir qator ishlarni amalga oshirish rejalashtirilgan bo‘lib, ularni qozonxonalarni to‘xtatmasdan turib bajarishning imkoni mavjud emas.
Veolia Energy Tashkent mahalliy qozonxonalari faoliyati to‘xtatilish davomiyligi ikki kun bo‘lib, bu 1-apreldan 31-maygacha amalga oshiriladi.
Biz taʼmirlash va profilaktika ishlarini, jumladan, klapanlarni almashtirish, tarmoq nasoslarini to‘liq tekshirish hamda almashtirish, elektr taʼminoti tizimlarini tekshirish, qozonxonalarning quvurlari va tegishli jihozlarini demontaj qilish va o‘rnatish, shuningdek, issiqlik almashtirgichlarda profilaktik ishlarni amalga oshiramiz, — deyiladi xabarda.
Issiq suv ta’minoti o‘chadigan manzillar bilan quyidagi havola orqali tanishish mumkin.
Ta’kidlanishicha, issiq suv ta’minoti o‘chiriladigan ikkinchi muddatda barcha 3 ta issiqlik ishlab chiqaruvchi korxona (“Toshkent Issiqlik markazi”, “Toshkent issiqlik elektr markazi”, Veolia Energy Tashkent)ning markaziy qozonxonalari faoliyati to‘xtatiladi:
- davomiyligi — 4 kun;
- davr — 15-apreldan 31-maygacha.
Ushbu davr mobaynida Toshkent shahridagi issiq suv taʼminoti tizimini taʼmirlash va texnik xizmat ko‘rsatishni amalga oshiriladi. Veolia Energy Tashkent kompaniyasi xodimlari kelgusidagi isitish mavsumida yanada samarali va ishonchli issiqlik taʼminotini yetkazib berish maqsadida eskirgan kommunikatsiyalarni almashtirib, issiqlik tarmoqlarini modernizatsiya qiladi. O‘chirish jadvali keyinroq eʼlon qilinishi aytilgan.
Veolia Energy Tashkent MCHJ XK yuzaga kelgan noqulayliklar uchun uzr so‘raydi va ishlarni o‘z vaqtida yakunlash uchun barcha zarur choralarni ko‘radi.
Izoh (0)