O‘zbekistonning besh viloyatidagi elektr ta’minotida uzilishlar sodir bo‘ldi

O‘zbekistonning beshta viloyati elektr ta’minotida uzilishlar sodir bo‘ldi, deb xabar bermoqda Energetika vazirligi axborot xizmati. 

Unga ko‘ra, soat 14:45 da Qashqadaryo viloyatidagi “Tolimarjon” issiqlik elektr stansiyasining 2 ta bug‘-gaz qurilmasida nosozlik yuzaga kelgan. Buning natijasida Surxondaryo, Qashqadaryo, Samarqand, Buxoro va Jizzax viloyatlarining ayrim hududlaridagi iste’molchilarga elektr energiyasi yetkazib berishda qisqa muddatli uzilishlar kuzatilgan.

Soat 15:10 da (25 daqiqada) yuqoridagi barcha iste’molchilar zaxira manbalar yordamida elektr energiyasi bilan to‘liq ta’minlangan. Hozirgi vaqtda mazkur stansiyaning maxsus brigadasi tomonidan nosozlikni bartaraf etish ishlari olib borilmoqda.

Vazirlik keltirilgan noqulayliklar uchun iste’molchilardan uzr so‘radi.