Maktabgacha va maktab taʼlimi vazirining 2024-yil 20-martdagi tegishli buyrug‘i bilan umumiy o‘rta taʼlim muassasalarida yakuniy davlat attestatsiyasi o‘tkazish tartibi tasdiqlandi.
Unga ko‘ra, 9-sinf o‘quvchilarining yakuniy davlat attestatsiyasi:
- ona tili va adabiyot fanidan — yozma;
- davlat tili fani (taʼlim tili o‘zbek tili bo‘lmagan sinflar uchun)dan — yozma;
- matematika fanidan — yozma;
- O‘zbekiston tarixi fanidan — yozma/og‘zaki;
- jismoniy tarbiya fanidan — amaliy shaklda o‘tkaziladi.
11-sinf o‘quvchilarining yakuniy davlat attestatsiyasi:
- ona tili va adabiyot fanidan — yozma (insho);
- matematika fanidan — yozma;
- o‘zbek tili fanidan (taʼlim o‘zbek tilida olib borilmaydigan umumiy o‘rta taʼlim muassasalari uchun, taʼlim muassasasi tanlovi asosida) — yozma va og‘zaki;
- chet tili fanidan — yozma/og‘zaki;
- O‘zbekiston tarixi fanidan — yozma/og‘zaki;
- (o‘quvchining tanlovi bo‘yicha) kimyo, fizika, davlat huquq asoslari, geografiya fanlaridan — yozma shaklda o‘tkaziladi.
Bitiruv imtihonlari (jismoniy tarbiya fanidan tashqari) 2024-yil 26-maydan 15-iyunga qadar, xususan, 9-sinf bitiruvchilari uchun:
- ona tili va adabiyot fanidan — 27-may kuni;
- matematika fanidan — 30-may kuni.
11-sinflar uchun:
- ona tili va adabiyot fanidan — 29-may;
- matematika fanidan — 1-iyun kuni bo‘lib o‘tadi.
Jismoniy tarbiya fani imtihonlari (9-sinf o‘quvchilari uchun) 2024-yil 1—6-may kunlari malakali tibbiyot xodimlari nazorati ostida o‘tkaziladi.
Umumtaʼlim fanini bilish darajasi to‘g‘risida davlat namunasidagi sertifikat hamda chet tili fanlari bo‘yicha kamida B1 darajadagi milliy yoki unga tenglashtirilgan mos darajadagi xalqaro tan olingan sertifikatga ega bo‘lgan o‘quvchilar imtihondan muayyan fandan ozod qilinadi.
Maʼlumot uchun, 11-sinfda har bir o‘quvchining ixtiyoriy tanloviga ko‘ra tanlov (variativ) fanlaridan biri yakuniy davlat attestatsiyasi o‘tkazilishidan bir oy oldin o‘quvchining arizasiga ko‘ra tanlanadi. 11-sinfda har bir o‘quvchining ixtiyoriy tanlovi va ota-onalarning fikrlariga asoslanib tanlov (variativ) fanlaridan biri yakuniy davlat attestatsiyasi o‘tkazilishidan bir oy oldin taʼlim muassasasi tomonidan tanlanadi.
Tanlov fani majburiy fanlardan tashqari taklif etilgan fanlar orasidan tanlanadi.
Avvalroq O‘zbekistonda ayrim pedagoglar kasbiy sertifikatlash sinovlaridan o‘tkazilishi to‘g‘risida xabar berilgandi. Vazirlar Mahkamasining qarori bilan davlat umumiy o‘rta ta’lim tashkilotlari pedagog kadrlarini kasbiy sertifikatlash bo‘yicha davlat xizmatlarini ko‘rsatishning ma’muriy reglamenti tasdiqlangan.
Izoh (0)