Italiyada 16–17-aprel kunlari “O‘zbekiston: Sahrodagi avangard” ko‘rgazma loyihasining ochilishi bo‘lib o‘tadi. Bu haqda Madaniyat va sanʼatni rivojlantirish jamg‘armasi matbuot xizmati xabar berdi.
Maʼlum qilinishicha, “O‘zbekiston: Sahrodagi avangard” ko‘rgazmasi Italiya va jahon jamoatchiligiga XX asr birinchi yarmi sanʼati tarixining muhim, ammo u qadar maʼlum bo‘lmagan bobini taqdim etadi. U ikkita bo‘limdan iborat bo‘lib, ikkita maskan: Venetsiyadagi Ka Foskari universiteti ko‘rgazma maydonida “Shakl va ramz” va Florensiyaning Pitti saroyida “Nur va rang” nomi bilan o‘tkaziladi.
Loyiha O‘zbekiston Madaniyat va sanʼatni rivojlantirish jamg‘armasi ko‘magida yaratilgan bo‘lib, unga Ka Foskari universiteti huzuridagi Rus sanʼati tadqiqotlari markazi (CSAR)dan Silvia Burini va Juzeppe Barbiyeri kuratorlik qiladi.
Ko‘rgazmalarda XX asrning birinchi yarmida yaratilgan 172 tadan ortiq rangtasvir asarlari va suratlar, shuningdek, Igor Savitskiy nomidagi Qoraqalpog‘iston davlat sanʼat muzeyi va O‘zbekiston davlat sanʼat muzeyida saqlanayotgan milliy bezak va amaliy sanʼat buyumlari namoyish etiladi.
“O‘zbekiston: Sahrodagi avangard” ko‘rgazmasining “Nur va rang” bo‘limi 16-apreldan 30-iyungacha Florensiyadagi Pitti saroyida ochiladi. “Shakl va ramz” loyihasi 17-apreldan 29-sentyabrgacha Venetsiyadagi Ka Foskari universitetining ko‘rgazma maydonida ish olib boradi.
Izoh (0)