Италияда 16–17 апрель кунлари “Ўзбекистон: Саҳродаги авангард” кўргазма лойиҳасининг очилиши бўлиб ўтади. Бу ҳақда Маданият ва санъатни ривожлантириш жамғармаси матбуот хизмати хабар берди.
Маълум қилинишича, “Ўзбекистон: Саҳродаги авангард” кўргазмаси Италия ва жаҳон жамоатчилигига ХХ аср биринчи ярми санъати тарихининг муҳим, аммо у қадар маълум бўлмаган бобини тақдим этади. У иккита бўлимдан иборат бўлиб, иккита маскан: Венециядаги Ка Фоскари университети кўргазма майдонида “Шакл ва рамз” ва Флоренциянинг Питти саройида “Нур ва ранг” номи билан ўтказилади.
Лойиҳа Ўзбекистон Маданият ва санъатни ривожлантириш жамғармаси кўмагида яратилган бўлиб, унга Ка Фоскари университети ҳузуридаги Рус санъати тадқиқотлари маркази (CSАR)дан Силвиа Бурини ва Жузеппе Барбиери кураторлик қилади.
Кўргазмаларда ХХ асрнинг биринчи ярмида яратилган 172 тадан ортиқ рангтасвир асарлари ва суратлар, шунингдек, Игор Савицкий номидаги Қорақалпоғистон давлат санъат музейи ва Ўзбекистон давлат санъат музейида сақланаётган миллий безак ва амалий санъат буюмлари намойиш этилади.
“Ўзбекистон: Саҳродаги авангард” кўргазмасининг “Нур ва ранг” бўлими 16 апрелдан 30 июнгача Флоренциядаги Питти саройида очилади. “Шакл ва рамз” лойиҳаси 17 апрелдан 29 сентябргача Венециядаги Ка Фоскари университетининг кўргазма майдонида иш олиб боради.
Изоҳ (0)