O‘zbekiston va Qatar atrof-muhitni muhofaza qilish va iqlim o‘zgarishi yo‘nalishlarida hamkorlik qilishi aytildi.
Xabar berilishicha, O‘zbekiston elchisi Ashraf Xodjayev Qatar atrof-muhit va iqlim o‘zgarishi vaziri Abdullo Al-Subaiy bilan uchrashuv o‘tkazdi. Muloqot chog‘ida cho‘llanishning oldini olish, suvni tejamkorlik bilan ishlatish, “yashil” iqtisodiyot kabi yo‘nalishlarda o‘zaro hamkorlikni rivojlantirish masalalari muhokama qilindi.
Vazir Abdullo Al-Subaiyning aytishicha, Qatar so‘nggi yillarda mazkur yo‘nalishlarga katta eʼtibor qaratmoqda. Jumladan, mamlakatning “2030-yilgacha bo‘lgan taraqqiyot strategiyasi” doirasida “yashil” iqtisodiyot, sahro sharoitida va yozdagi namlik hamda yuqori harorat holatida ko‘kalamzorlashtirish, tomchilab sug‘orish va ushbu jarayonlarga zamonaviy texnologiyalarni jalb etish bo‘yicha ishlar olib borilmoqda.
Shuningdek, global iqlim o‘zgarishi oqibatlarining oldini olish maqsadida hamda Parij bitimiga muvofiq Qatar 2030-yilgacha umumiy chiqindilarni 25 foizga kamaytirish majburiyatini o‘z zimmasiga olgani maʼlum qilindi. Taʼkidlanishicha, so‘nggi paytlarda Qatarda “toza” energiyaga sarmoya kiritish va resurslardan samarali foydalanishga erishish uchun ko‘plab loyiha va tashabbuslar amalga oshirilmoqda.
O‘z navbatida, Qatar tomoniga O‘zbekistonning iqlim kun tartibi sohasidagi saʼy-harakatlari, “yashil” rivojlanish, atrof-muhitni muhofaza qilish va suv resurslaridan oqilona foydalanish, cho‘llanishga qarshi kurashish, shuningdek, ekologik inqiroz natijasida Orolbo‘yi mintaqasidagi halokatli vaziyat haqida batafsil maʼlumot berildi.
Uchrashuv natijasida tajriba almashish, O‘zbekiston va Qatarda o‘tkaziladigan xalqaro tadbirlarda o‘zaro delegatsiyalarning ishtirokini taʼminlash kabi yo‘nalishlarda hamkorlikni faollashtirish bo‘yicha kelishuvga erishildi.
Izoh (0)