Buxoro viloyati G‘ijduvon tumanida yashovchi 38 yoshli (ayol) H.G. ichki ishlar organiga murojaat qilib, uning nomiga nomaʼlum sabablarga ko‘ra onlayn kredit rasmiylashtirilganligini maʼlum qilgan. Bu haqda Kiberxavfsizlik markazi matbuot xizmati xabar berdi.
Maʼlum qilinishicha, tezkor-qidiruv xizmati Kiberxavfsizlik bo‘linmalari xodimlari tomonidan o‘tkazilgan tezkor-qidiruv tadbirlari natijasida mazkur jinoyatni Andijon viloyati Marhamat tumanida yashovchi 25 yoshli O.X. sodir etganligi aniqlangan.
Unga ko‘ra, O.X., jabrlanuvchi (ayol) H.G.ga qo‘ng‘iroq qilgan va o‘zini bank operatori sifatida tanishtirib, SMS xabarnoma (soxta havola) yuborish orqali shaxsiy maʼlumotlarini qo‘lga kiritib, uning nomidan mobil ilova orqali ro‘yxatdan o‘tgan. Onlayn tarzda 40 mln so‘m onlayn kredit rasmiylashtirib, o‘sha vaqtning o‘zida mazkur pullarni o‘zining foydalanuvida bo‘lgan bank plastik kartasiga o‘tkazib olgan.
Mazkur holat yuzasidan Jinoyat kodeksining 168-moddasi 3-qismi (firibgarlik) bilan jinoyat ishi qo‘zg‘atilib, O.X.ning sodir etilib fosh etilmay qolgan boshqa shu turdagi jinoyatlarga aloqadorligini tekshirish yuzasidan tezkor-surishtiruv ishlari olib borilmoqda.
Izoh (0)