Toshkentning Mirzo Ulug‘bek tumanida joylashgan 7-son oilaviy poliklinikada oilaviy poliklinikada “Elektron poliklinika” axborot tizimining takomillashtirilgan yangi talqini pilot tariqasida ishga tushirildi. Bu haqda Sog‘liqni saqlash vazirligi matbuot xizmati xabar berdi.
Maʼlum qilinishicha, mazkur dasturning patronaj xizmati raqamlashtirilib, “Elektron retsept” (reimbursatsiya) tizimi joriy etilgan.
Sog‘liqni saqlash vazirligi bo‘lim boshlig‘i Nodir Eshnazarovga ko‘ra, unda real vaqt rejimida statistik maʼlumotlarni shakllantirish va bemorlarga oid shaxsiy maʼlumotlarni yetarli darajada himoyalash taʼminlangan hamda axborot tizimlar o‘zaro integratsiya qilingan.
Xabarda taʼkidlanishicha, takomillashtirilgan “Elektron poliklinika” axborot tizimining joriy etilishi hisobiga avval bemor shifokor qabulida 40 daqiqa navbat kutgan bo‘lsa, endilikda mutaxassis ko‘rigiga onlayn yozilish orqali bu vaqt 10 daqiqagacha qisqaradi.
Shuningdek, avtomatik hisobot shakllanishi orqali oylik 28 turdagi blanka va formalar bekor qilindi. Bundan tashqari, tibbiy maʼlumotlarni elektron shaklda saqlash imkoni yaratildi, tizim Davlat personallashtirish markazi, MIS-2 va Elektron hukumat platformalari bilan integratsiya qilindi.
“Mazkur yangilikning yana bir qulayligi shundaki, oilaviy poliklinikaga kelgan bemorning yuzini aniqlash dasturlari orqali darhol xizmat ko‘rsatish rejimiga o‘tiladi. Yaʼni fuqarodan shaxsni tasdiqlovchi hujjatlar so‘rash bilan ortiqcha vaqt yo‘qotilishi va ovoragarchiliklarga chek qo‘yiladi.
Shuningdek, uning yordamida yagona tibbiy raqam shakllantirilib, bemor statsionar davolanishlar yoki yagona interaktiv davlat xizmatlari portali orqali ko‘rsatiladigan xizmatlardan foydalanishi va o‘ziga tegishli tibbiy maʼlumotnomalar bilan masofaviy tanishish imkoniga ega bo‘ladi”, – deyiladi xabarda.
Izoh (0)