O‘zbekistonning uch viloyatida: Sirdaryo, Surxondaryo va Namanganda kredit mablag‘larini o‘zlashtirish holatlari aniqlandi. Bu haqda Iqtisodiy jinoyatlarga qarshi kurashish departamenti xabar berdi.
Unga ko‘ra, Bosh prokuratura huzuridagi departamentning Sirdaryo viloyat boshqarmasi tomonidan o‘tkazilgan tergovga qadar tekshiruvda Sayxunobod tumanida faoliyat yurituvchi “S-S.” MCHJ mas’ul shaxslari hududiy tijorat banki filialidan ajratilgan 1,6 milliard so‘m kredit mablag‘lari hisobidan mahalla guzari va maishiy xizmat ko‘rsatish sexini qurmasdan, kredit mablag‘larini boshqa maqsadlarda sarflab talon-toroj qilgani aniqlangan.
Shuningdek, departamentning Namangan tuman bo‘limi tomonidan o‘tkazilgan tergovga qadar tekshiruvda “B.M.” MCHJ sobiq rahbari A.Q. va boshqalar 935 million so‘m imtiyozli kredit mablag‘lari evaziga xorijdan olib kelingan 4 turdagi jami 7 dona mebel ishlab chiqarish dastgohlarini boshqa shaxslarga sotib yuborib, ushbu mablag‘larini o‘zlashtirish yo‘li bilan talon-toroj qilgani aniqlangan.
Departamentning Jarqo‘rg‘on tuman bo‘limi tomonidan o‘tkazilgan tergovga qadar tekshiruvda esa fuqaro N.SH. hamda tumandagi “I.” MFY bo‘yicha hokim yordamchisi X.M. 11 nafar fuqaro va YTT U.T.ning nomiga soxta hujjatlarni rasmiylashtirish orqali 698 million so‘m kredit ajratib, ushbu mablag‘larni o‘zlashtirish yo‘li bilan talon-toroj qilgani aniqlangan.
Mazkur holatlar yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) va 209-moddasi (mansab soxtakorligi) bilan jinoyat ishlari qo‘zg‘atilib, tergov harakatlari o‘tkazilmoqda.
Izoh (0)